kahin bhi aap ka rahat koi maqam nahin

kahīñ bhī aap kā 'rāhat' koī maqām nahīñ

gunāhgāroñ kī fihrist meñ bhī naam nahīñ

kisī kī yaad hī aane se ab jhijaktī hai

hamāre zehn meñ pahlī sī dhūm-dhām nahīñ

hamārī ruuh pighaltī hai sher kahne meñ

ye kaam log samajhte haiñ koī kaam nahīñ

kahāñ se raushnī aa.egī ḳhāna-e-dil meñ

ki shaam Dhalne lagī hai tulū-e-jām nahīñ

ye kis ke sher nasīm-e-sahar sunātī hai

mirā kalām nahīñ aap kā kalām nahīñ

ham us ke faiz se jannat-makīñ to haiñ lekin

udhar kisī se hamārī duā-salām nahīñ

mirī talāsh na.ī manzileñ dikhātī hai

Thahar gayā huuñ jahāñ vo mirā maqām nahīñ

ḳharāb-hālī-e-gulshan se kyoñ pareshān huuñ

hamāre haath meñ gulshan kā intizām nahīñ

ubhar bhī saktā huuñ 'rāhat' maiñ varta-e-ġham se

bashar ke bas kā na ho aisā koī kaam nahīñ

kahin bhi aap ka 'rahat' koi maqam nahin

gunahgaron ki fihrist mein bhi nam nahin

kisi ki yaad hi aane se ab jhijakti hai

hamare zehn mein pahli si dhum-dham nahin

hamari ruh pighalti hai sher kahne mein

ye kaam log samajhte hain koi kaam nahin

kahan se raushni aaegi KHana-e-dil mein

ki sham Dhalne lagi hai tulu-e-jam nahin

ye kis ke sher nasim-e-sahar sunati hai

mera kalam nahin aap ka kalam nahin

hum us ke faiz se jannat-makin to hain lekin

udhar kisi se hamari dua-salam nahin

meri talash nai manzilen dikhati hai

Thahar gaya hun jahan wo mera maqam nahin

KHarab-haali-e-gulshan se kyon pareshan hun

hamare hath mein gulshan ka intizam nahin

ubhar bhi sakta hun 'rahat' main warta-e-gham se

bashar ke bas ka na ho aisa koi kaam nahin