kahin bhi ho nazar aata hai par dil mein sanam mujhko

kahīñ bhī ho nazar aatā hai par dil meñ sanam mujh ko

ḳhudā ne baḳhsh kar dil de diyā hai jām-e-jam mujh ko

baḌā marhūn-e-minnat huuñ tirā ai gardish-e-daurāñ

ki terī Thokaroñ ne kar diyā sābit-qadam mujh ko

mirī tar-dāmanī ne mujh ko vo taqdīs baḳhshī hai

jahāñ meñ DhūñDte phirte haiñ ab dair-o-haram mujh ko

maiñ ḳhush kyūñkar na huuñ āḳhir ġham-e-jānāñ ke milne par

ki saarī rāhateñ de kar milā hai us kā ġham mujh ko

na chheḌo tazkira us kī jafāoñ kā mire aage

sitamgar ke abhī tak yaad haiñ lutf-o-karam mujh ko

vahāñ se mauj-e-kausar ḳhud mujhe le jā.egī aa kar

dar-e-mai-ḳhāna tak chhoḌ aao yaaro kam se kam mujh ko

hazāroñ zindagī kī uljhanoñ meñ 'soz' uljhā thā

chhuḌā laa.e kisī ke gesūoñ ke pech-o-ḳham mujh ko

kahin bhi ho nazar aata hai par dil mein sanam mujh ko

KHuda ne baKHsh kar dil de diya hai jam-e-jam mujh ko

baDa marhun-e-minnat hun tera ai gardish-e-dauran

ki teri Thokaron ne kar diya sabit-qadam mujh ko

meri tar-damani ne mujh ko wo taqdis baKHshi hai

jahan mein DhunDte phirte hain ab dair-o-haram mujh ko

main KHush kyunkar na hun aaKHir gham-e-jaanan ke milne par

ki sari rahaten de kar mila hai us ka gham mujh ko

na chheDo tazkira us ki jafaon ka mere aage

sitamgar ke abhi tak yaad hain lutf-o-karam mujh ko

wahan se mauj-e-kausar KHud mujhe le jaegi aa kar

dar-e-mai-KHana tak chhoD aao yaro kam se kam mujh ko

hazaron zindagi ki uljhanon mein 'soz' uljha tha

chhuDa lae kisi ke gesuon ke pech-o-KHam mujh ko