kahin charagh bujhana paDa ki main bhi hun

kahīñ charāġh bujhānā paḌā ki maiñ bhī huuñ

kahīñ pe ḳhud ko jalānā paḌā ki maiñ bhī huuñ

mere gale meñ jo Daalā mere harīfoñ ne

mujhe vo Dhol bajānā paḌā ki maiñ bhī huuñ

tirī atā vo tajassus hai jis ke baḌhne par

tujhe bhī tuur pe aanā paḌā ki maiñ bhī huuñ

vo baar baar mujhe bhūltā thā aur mujhe

ye bār-bār batānā paḌā ki maiñ bhī huuñ

sunā thā ā.eñge mahfil meñ dil-darīda log

mujhe bhī zaḳhm dikhānā paḌā ki maiñ bhī huuñ

vahāñ pe ḳhud ko dikhāyā jahāñ maiñ thā hī nahīñ

kahīñ ye sach bhī chhupānā paḌā ki meñ bhī huuñ

maiñ māntā huuñ ki ḳhāmosh hai magar vo hai

mujhe to shor machānā paḌā ki maiñ bhī huuñ

huā nahīñ to bhī sābit karūñgā hone ko

agar yaqīn dilānā paḌā ki maiñ bhī huuñ

'hasan' hai itnā zarūrī vajūd kā iz.hār

havā ko peḌ hilānā paḌā ki maiñ bhī huuñ

kahin charagh bujhana paDa ki main bhi hun

kahin pe KHud ko jalana paDa ki main bhi hun

mere gale mein jo Dala mere harifon ne

mujhe wo Dhol bajaana paDa ki main bhi hun

teri ata wo tajassus hai jis ke baDhne par

tujhe bhi tur pe aana paDa ki main bhi hun

wo bar bar mujhe bhulta tha aur mujhe

ye bar-bar batana paDa ki main bhi hun

suna tha aaenge mahfil mein dil-darida log

mujhe bhi zaKHm dikhana paDa ki main bhi hun

wahan pe KHud ko dikhaya jahan main tha hi nahin

kahin ye sach bhi chhupana paDa ki mein bhi hun

main manta hun ki KHamosh hai magar wo hai

mujhe to shor machana paDa ki main bhi hun

hua nahin to bhi sabit karunga hone ko

agar yaqin dilana paDa ki main bhi hun

'hasan' hai itna zaruri wajud ka izhaar

hawa ko peD hilana paDa ki main bhi hun