kahin dar se kahin diwar se Dar lagta hai

kahīñ dar se kahīñ dīvār se Dar lagtā hai

aise ghar meñ huuñ ki iz.hār se Dar lagtā hai

aisī dīvānī hai barsāt na.e mausam kī

us kī yalġhār-e-dhuāñ-dhār se Dar lagtā hai

tez hotī haiñ havā.eñ to parindoñ ko mire

apnī parvāz ke iqrār se Dar lagtā hai

sub.h ke dar pe bichhī dekhī haiñ lāsheñ itnī

shaam se shaam ke darbār se Dar lagtā hai

jis kā phailāo qalam-band nahīñ ho saktā

mujh ko us nuqta-e-parkār se Dar lagtā hai

phailtā hai mire andar jo usī jangal ke

ek ik gosha-e-pur-ḳhār se Dar lagtā hai

ab Tapaktā hai mirā ḳhuun ik ik uñglī se

ab qalam aur qalamkār se Dar lagtā hai

puurī sachchā.ī kā manzar hai mirī āñkhoñ meñ

puurī sachchā.ī ke kirdār se Dar lagtā hai

maiñ huuñ parvarda khulī raah khule āñgan kā

band kamroñ ke sarokār se Dar lagtā hai

kis tarah tai ho 'alāmat se 'alāmat kā safar

zimmedārī ke girāñ baar se Dar lagtā hai

jo shajar hotā hai bharpūr samar-var 'vasfī'

us ko har shāḳh-e-samar-dār se Dar lagtā hai

kahin dar se kahin diwar se Dar lagta hai

aise ghar mein hun ki izhaar se Dar lagta hai

aisi diwani hai barsat nae mausam ki

us ki yalghaar-e-dhuan-dhaar se Dar lagta hai

tez hoti hain hawaen to parindon ko mere

apni parwaz ke iqrar se Dar lagta hai

subh ke dar pe bichhi dekhi hain lashen itni

sham se sham ke darbar se Dar lagta hai

jis ka phailao qalam-band nahin ho sakta

mujh ko us nuqta-e-parkar se Dar lagta hai

phailta hai mere andar jo usi jangal ke

ek ek gosha-e-pur-KHar se Dar lagta hai

ab Tapakta hai mera KHun ek ek ungli se

ab qalam aur qalamkar se Dar lagta hai

puri sachchai ka manzar hai meri aankhon mein

puri sachchai ke kirdar se Dar lagta hai

main hun parwarda khuli rah khule aangan ka

band kamron ke sarokar se Dar lagta hai

kis tarah tai ho 'alamat se 'alamat ka safar

zimmedari ke giran bar se Dar lagta hai

jo shajar hota hai bharpur samar-war 'wasfi'

us ko har shaKH-e-samar-dar se Dar lagta hai