kahin dhara hai pas-e-tar-e-ankabut sukun

kahīñ dharā hai pas-e-tār-e-ankabūt sukūn

kahīñ pe kaat rahā hai maze se suut sukūn

sukūt maut hai yaaro sukūn ain-e-hayāt

agarche yaaro ham-āhañg haiñ sukūt sukūn

diloñ se duur ye vīrāniyoñ meñ rahtā hai

ki jis tarah se koī jin hai koī bhuut sukūn

farishtagī meñ ġhulāmī meñ kuchh nahīñ rakkhā

talāsh kiije baġhāvat meñ misl-e-hūt sukūn

hamāre gird hai be-jā ġhurūr kā ġhauġhā

isī liye hai hamāre yahāñ achhūt sukūn

jo kam-sinī meñ baḌhāyā kare the bechainī

diyā kare haiñ buḌhāpe meñ vo ḳhutūt sukūn

amīr-e-shahr ke ḳhutboñ se ghar jo chaltā hai

janāb-e-shaiḳh ko detī nahīñ qunūt sukūn

na pal-do-pal kī ye rāhat na pal-do-pal kā surūr

mujhe to chāhiye 'taslīm' lā-yamūt sukūn

kahin dhara hai pas-e-tar-e-ankabut sukun

kahin pe kat raha hai maze se sut sukun

sukut maut hai yaro sukun ain-e-hayat

agarche yaro ham-ahang hain sukut sukun

dilon se dur ye viraniyon mein rahta hai

ki jis tarah se koi jin hai koi bhut sukun

farishtagi mein ghulami mein kuchh nahin rakkha

talash kije baghawat mein misl-e-hut sukun

hamare gird hai be-ja ghurur ka ghaugha

isi liye hai hamare yahan achhut sukun

jo kam-sini mein baDhaya kare the bechaini

diya kare hain buDhape mein wo KHutut sukun

amir-e-shahr ke KHutbon se ghar jo chalta hai

janab-e-shaiKH ko deti nahin qunut sukun

na pal-do-pal ki ye rahat na pal-do-pal ka surur

mujhe to chahiye 'taslim' la-yamut sukun