kahin dua to kahin harf-e-iltija Thahri

kahīñ duā to kahīñ harf-e-iltijā Thahrī

maiñ apne aap meñ Duubī to be-sadā Thahrī

maiñ jāntī huuñ salāmat nahīñ koī dāman

ye raushnī bhī kahāñ kis kā aa.ina Thahrī

safar thā shart magar jab bhī ek naam aayā

qadam to chalte rahe ruuh jā-ba-jā Thahrī

tū darmiyāñ meñ milā darmiyāñ meñ chhūT gayā

jo ibtidā thī mirī hadd-e-intihā Thahrī

havā kā haath pakaḌ kar guzar ga.ī ḳhushbū

maiñ terī raah meñ Thahrī agar to kyā Thahrī

sabhī haiñ ḳhush mire chehre pe kuchh ḳharāsheñ haiñ

koī nigāh kahāñ dard-āshnā Thahrī

phir us ke baa'd ghuTan ne mujhe nihāl kiyā

mire qarīb zarā der ko havā Thahrī

safar nasīb rahā sirf tere naam ke saath

tirī nazar meñ magar phir bhī bevafā Thahrī

qarīb aane kī koshish to us ne kī 'ūshā'

maiñ us ke haq meñ magar ḳhud hī fāsla Thahrī

kahin dua to kahin harf-e-iltija Thahri

main apne aap mein Dubi to be-sada Thahri

main jaanti hun salamat nahin koi daman

ye raushni bhi kahan kis ka aaina Thahri

safar tha shart magar jab bhi ek nam aaya

qadam to chalte rahe ruh ja-ba-ja Thahri

tu darmiyan mein mila darmiyan mein chhuT gaya

jo ibtida thi meri hadd-e-intiha Thahri

hawa ka hath pakaD kar guzar gai KHushbu

main teri rah mein Thahri agar to kya Thahri

sabhi hain KHush mere chehre pe kuchh KHarashen hain

koi nigah kahan dard-ashna Thahri

phir us ke ba'd ghuTan ne mujhe nihaal kiya

mere qarib zara der ko hawa Thahri

safar nasib raha sirf tere nam ke sath

teri nazar mein magar phir bhi bewafa Thahri

qarib aane ki koshish to us ne ki 'usha'

main us ke haq mein magar KHud hi fasla Thahri