kahin hai dagh-e-nakaami kahin hai KHun arman ka

kahīñ hai dāġh-e-nākāmī kahīñ hai ḳhuun armāñ kā

hamārā dil muraqqā ban gayā hai yās-o-hirmāñ kā

jahāñ vāloñ pe maiñ ehsān karke bhuul jaatā huuñ

mire aḳhlāq ko chamkā rahā hai naqsh nisyāñ kā

alā.eq meñ ulajh kar fursat-e-nazzāra kho baiThā

nihāyat diid ke qābil thā manzar bazm-e-imkāñ kā

baḌhī hai tishnagī sairāb kar do paañv ke chhālo

zarā sā muñh nikal aayā hai har ḳhār-e-bayābāñ kā

nahīñ haiñ 'hālī'-o-'iqbāl' se shā'ir to kyā ġham hai

abhī ik dam ġhanīmat hai to 'jarrār'-e-suḳhan-dāñ kā

kahin hai dagh-e-nakaami kahin hai KHun arman ka

hamara dil muraqqa ban gaya hai yas-o-hirman ka

jahan walon pe main ehsan karke bhul jata hun

mere aKHlaq ko chamka raha hai naqsh nisyan ka

alaeq mein ulajh kar fursat-e-nazzara kho baiTha

nihayat did ke qabil tha manzar bazm-e-imkan ka

baDhi hai tishnagi sairab kar do panw ke chhaalo

zara sa munh nikal aaya hai har KHar-e-bayaban ka

nahin hain 'haali'-o-'iqbaal' se sha'ir to kya gham hai

abhi ek dam ghanimat hai to 'jarrar'-e-suKHan-dan ka