kahin jamal-paziri ki had nahin rakhta

kahīñ jamāl-pazīrī kī had nahīñ rakhtā

maiñ baḌh rahā huuñ tasalsul se qad nahīñ rakhtā

ye qabl o ba.ad ke us paar kī hikāyat hai

mirā davām azal aur abad nahīñ rakhtā

vo ek ho ke bhī ham se ginā nahīñ jaatā

vo ek ho ke bhī aage adad nahīñ rakhtā

ye umr bhar kī riyāzat mirā muqaddar hai

tarāshtā huuñ jise ḳhāl-o-ḳhad nahīñ rakhtā

vo ik suḳhan hī hamārī sanad na ban jaa.e

vo ik suḳhan jo tumhārī sanad nahīñ rakhtā

'turāb' kāsa-e-dil pesh kar diyā jaa.e

sunā hai koī saḳhāvat kī had nahīñ rakhtā

kahin jamal-paziri ki had nahin rakhta

main baDh raha hun tasalsul se qad nahin rakhta

ye qabl o baad ke us par ki hikayat hai

mera dawam azal aur abad nahin rakhta

wo ek ho ke bhi hum se gina nahin jata

wo ek ho ke bhi aage adad nahin rakhta

ye umr bhar ki riyazat mera muqaddar hai

tarashta hun jise KHal-o-KHad nahin rakhta

wo ek suKHan hi hamari sanad na ban jae

wo ek suKHan jo tumhaari sanad nahin rakhta

'turab' kasa-e-dil pesh kar diya jae

suna hai koi saKHawat ki had nahin rakhta