kahin jangal ugate hain kahin aahu banate hain

kahīñ jañgal ugāte haiñ kahīñ aahū banāte haiñ

musavvir haiñ tire pahlū ko sad pahlū banāte haiñ

bhalā kyā qatl par apne raqīboñ se gila ki vo

mirā naafā judā kar ke tirī ḳhushbū banāte haiñ

tahammul siikh ham se guftugū kar narm lahje meñ

ki sab tere ravayye hī ko apnī ḳhū banāte haiñ

kahīñ koī sitāra chhoḌte haiñ be-karānī meñ

kabhī andher nagrī meñ koī jugnū banāte haiñ

adū kaise sitamgar haiñ mujhe tasḳhīr karne ko

tirī tasvīr ke uupar mire baazū banāte haiñ

hameñ to ḳhvāb meñ bhī zulf suljhāne kī aadat hai

magar vo log jo uljhe hue gesū banāte haiñ

tire ka.abe se kuchh īmān vāloñ ko ġharaz hogī

ki ham kāfir to but-ḳhāna bhī qibla-rū banāte haiñ

ham aise kushtagān-e-ḳhāk hī 'ākāsh' sahrā meñ

sabā ko apne dil kī dhoñknī se lau banāte haiñ

kahin jangal ugate hain kahin aahu banate hain

musawwir hain tere pahlu ko sad pahlu banate hain

bhala kya qatl par apne raqibon se gila ki wo

mera nafa juda kar ke teri KHushbu banate hain

tahammul sikh hum se guftugu kar narm lahje mein

ki sab tere rawayye hi ko apni KHu banate hain

kahin koi sitara chhoDte hain be-karani mein

kabhi andher nagri mein koi jugnu banate hain

adu kaise sitamgar hain mujhe tasKHir karne ko

teri taswir ke upar mere bazu banate hain

hamein to KHwab mein bhi zulf suljhane ki aadat hai

magar wo log jo uljhe hue gesu banate hain

tere kabe se kuchh iman walon ko gharaz hogi

ki hum kafir to but-KHana bhi qibla-ru banate hain

hum aise kushtagan-e-KHak hi 'akash' sahra mein

saba ko apne dil ki dhonkni se lau banate hain