kahin KHala mein koi ruh chiKHti hogi

kahīñ ḳhalā meñ koī ruuh chīḳhtī hogī

mirā ḳhayāl hai ab shaam Dhal chukī hogī

paḌhā to thā kahīñ maiñ ne kisī faqīr kā qaul

baġhāvatoñ kī nigahbāñ supurdagī hogī

maiñ ḳhud se mahv-e-takallum thā be-hijābāna

mujhe ḳhabar na thī duniyā bhī sun rahī hogī

mire vajūd ko āhang bhī usī ne diyā

mire adam kā sabab bhī yahī sadī hogī

abhī abhī jo sar-e-rahguzar milī thī mujhe

vo dhuup chhāñv kī mūrat kahāñ ga.ī hogī

safīna-e-vaqt kise apne muñh lagātā hai

hamīñ ne phir koī baat aisī vaisī kī hogī

hayāt meñ vo maqām aa rahā hai ab ki jahāñ

na e'tiqād muāvin na āgahī hogī

ajiib ḳhauf musallat dil-o-dimāġh pe hai

mire safar kī ye shab shāyad āḳhirī hogī

ye january kā mahīna bhī kaT gayā 'hairat'

ḳhudā ke fazl se kal ek farvarī hogī

kahin KHala mein koi ruh chiKHti hogi

mera KHayal hai ab sham Dhal chuki hogi

paDha to tha kahin main ne kisi faqir ka qaul

baghawaton ki nigahban supurdagi hogi

main KHud se mahw-e-takallum tha be-hijabana

mujhe KHabar na thi duniya bhi sun rahi hogi

mere wajud ko aahang bhi usi ne diya

mere adam ka sabab bhi yahi sadi hogi

abhi abhi jo sar-e-rahguzar mili thi mujhe

wo dhup chhanw ki murat kahan gai hogi

safina-e-waqt kise apne munh lagata hai

hamin ne phir koi baat aisi waisi ki hogi

hayat mein wo maqam aa raha hai ab ki jahan

na e'tiqad muawin na aagahi hogi

ajib KHauf musallat dil-o-dimagh pe hai

mere safar ki ye shab shayad aaKHiri hogi

ye january ka mahina bhi kaT gaya 'hairat'

KHuda ke fazl se kal ek farwari hogi