kahin lal-o-gohar paida kahin shams-o-qamar paida

kahīñ la.al-o-gohar paidā kahīñ shams-o-qamar paidā

tajallī aap kar letī hai har-sū jalva-gar paidā

jo hotī hai kisī meñ garmī-e-qalb-o-jigar paidā

to us kī chashm-e-tar kartī hai miTTī se guhar paidā

ye parde husn ke haiñ imtihān-e-shauq ke sāmāñ

yahī parde to karte haiñ jahāñ meñ parda-dar paidā

jo musht-e-ḳhāk meñ ho jaa.e shāhīñ kā jigar paidā

to āsānī se ho sakte haiñ us ke bāl-o-par paidā

ye kyoñ be-nūr ho jaatī hai chashm-e-nargis-e-bīnā

chaman meñ jab kabhī hotā hai koī dīda-var paidā

duā-e-maġhfirat ka.aba meñ Dhā kar ka.aba-e-dil ko

kahīñ aisī duāoñ meñ bhī hotā hai asar paidā

sar-e-bazm-e-azal kuchh muzmahil dekhā jo insāñ ko

to dil meñ kar diyā us ke mohabbat kā sharar paidā

ab aise mai-kade meñ 'amjad'-e-sarmast rahtā hai

man-o-tū kā tanāza hai na jis meñ shor-o-shar paidā

kahin lal-o-gohar paida kahin shams-o-qamar paida

tajalli aap kar leti hai har-su jalwa-gar paida

jo hoti hai kisi mein garmi-e-qalb-o-jigar paida

to us ki chashm-e-tar karti hai miTTi se guhar paida

ye parde husn ke hain imtihan-e-shauq ke saman

yahi parde to karte hain jahan mein parda-dar paida

jo musht-e-KHak mein ho jae shahin ka jigar paida

to aasani se ho sakte hain us ke baal-o-par paida

ye kyon be-nur ho jati hai chashm-e-nargis-e-bina

chaman mein jab kabhi hota hai koi dida-war paida

dua-e-maghfirat kaba mein Dha kar kaba-e-dil ko

kahin aisi duaon mein bhi hota hai asar paida

sar-e-bazm-e-azal kuchh muzmahil dekha jo insan ko

to dil mein kar diya us ke mohabbat ka sharar paida

ab aise mai-kade mein 'amjad'-e-sarmast rahta hai

man-o-tu ka tanaza hai na jis mein shor-o-shar paida