kahin nazar joDi ja rahi hai to dil kahin toDe ja rahe hain

kahīñ nazar joḌī jā rahī hai to dil kahīñ toḌe jā rahe haiñ

hameñ na chheḌo ham in tamāshoñ ko dekh kar chhoḌe jā rahe haiñ

jahāñ hai sarsabz kisht-e-armāñ ujaaḌ sahrā vahāñ rahegā

udhar ko jo bah rahī haiñ nahreñ ab un ke ruḳh moḌe jā rahe haiñ

suno ki jis jis ne tum ko chāhā usī ne bohtān tum pe bāñdhe

qasam mohabbat kī tohmateñ kuchh phir aaj ham joḌe jā rahe haiñ

ye rasm-e-mai-ḳhāna kyā hai āḳhir koī to pīr-e-muġhāñ se pūchhe

jo kal banā.e ga.e the kuuze vo aaj kyoñ toḌe jā rahe haiñ

fazā meñ ik do pahar ko garmī havā meñ ik do ghaḌī ko sho'le

yahī nishānī hai jalne vāloñ kī ham yahī chhoḌe jā rahe haiñ

siyāh-mastoñ kī laġhzishoñ par kab is se pardā paḌegā saaqī

jo raat toḌe ga.e vo shīshe sahar ko kyā joḌe jā rahe haiñ

nazar kī vo garmiyāñ bhī dekhīñ adā kī ye jhiḌkiyāñ bhī dekho

jo dil meñ Daale ga.e the 'rizvī' vo aable toḌe jā rahe haiñ

kahin nazar joDi ja rahi hai to dil kahin toDe ja rahe hain

hamein na chheDo hum in tamashon ko dekh kar chhoDe ja rahe hain

jahan hai sarsabz kisht-e-arman ujaD sahra wahan rahega

udhar ko jo bah rahi hain nahren ab un ke ruKH moDe ja rahe hain

suno ki jis jis ne tum ko chaha usi ne bohtan tum pe bandhe

qasam mohabbat ki tohmaten kuchh phir aaj hum joDe ja rahe hain

ye rasm-e-mai-KHana kya hai aaKHir koi to pir-e-mughan se puchhe

jo kal banae gae the kuze wo aaj kyon toDe ja rahe hain

faza mein ek do pahar ko garmi hawa mein ek do ghaDi ko sho'le

yahi nishani hai jalne walon ki hum yahi chhoDe ja rahe hain

siyah-maston ki laghzishon par kab is se parda paDega saqi

jo raat toDe gae wo shishe sahar ko kya joDe ja rahe hain

nazar ki wo garmiyan bhi dekhin ada ki ye jhiDkiyan bhi dekho

jo dil mein Dale gae the 'rizwi' wo aable toDe ja rahe hain