kahin par zindagi ka nam-e-nami mauj-masti hai

kahīñ par zindagī kā nām-e-nāmī mauj-mastī hai

kahīñ par ādmiyyat zinda rahne ko tarastī hai

jahān-e-zindagī kī qudratī tasvīr haiñ donoñ

kahīñ sūkhā paḌā hai aur kahīñ bārish barastī hai

tirī daulat tujhe kyā faiz pahuñchā.egī tere baa'd

mayassar zindagī jitnī bhī qīmat par ho sastī hai

kisī qābil meñ hotā to kabhī kā qatl ho jaatā

ki har ahl-e-salāhiyyat kī dushman merī bastī hai

mohabbat hī kiyā kartī hai āmāda baġhāvat par

mohabbat hī vafādārī kī zanjīroñ meñ kastī hai

kamā lenā magar hargiz na karnā pyaar daulat se

ye nāgin apne shaidā ko nihatthā kar ke Dastī hai

kabhī 'tālib' yahāñ insāniyat kī qadr hotī thī

magar ab jis taraf bhī dekhtā huuñ zar-parastī hai

kahin par zindagi ka nam-e-nami mauj-masti hai

kahin par aadmiyyat zinda rahne ko tarasti hai

jahan-e-zindagi ki qudrati taswir hain donon

kahin sukha paDa hai aur kahin barish barasti hai

teri daulat tujhe kya faiz pahunchaegi tere ba'd

mayassar zindagi jitni bhi qimat par ho sasti hai

kisi qabil mein hota to kabhi ka qatl ho jata

ki har ahl-e-salahiyyat ki dushman meri basti hai

mohabbat hi kiya karti hai aamada baghawat par

mohabbat hi wafadari ki zanjiron mein kasti hai

kama lena magar hargiz na karna pyar daulat se

ye nagin apne shaida ko nihattha kar ke Dasti hai

kabhi 'talib' yahan insaniyat ki qadr hoti thi

magar ab jis taraf bhi dekhta hun zar-parasti hai