kahin pe aankh kahin lab pe jaan di humne

kahīñ pe aañkh kahīñ lab pe jaan dī ham ne

isī tarah se gañvā dī hai zindagī ham ne

tumhāre baare meñ kuchh der to ġhalat sochā

phir apne aap pe talvār taan lī ham ne

ye kis maqām pe aa kar hamārā zabt gayā

ye kaise shaḳhs se saa.e kī baat kī ham ne

phir us ke baa'd huā yuuñ ki tum kahīñ na mile

jahāñ-jahāñ bhī talāshī hai zindagī ham ne

hameñ Thikāna thā darkār aur use panchhī

so ek peḌ se kar lī hai dostī ham ne

us ek baat pe dukh bhī huā hai hairat bhī

bichhaḌ ke tum se liye saañs vāqa'ī ham ne

tumhāre shahr meñ aise guzārā mushkil thā

so apne ruḳh se batā dī hai sādgī ham ne

majāl kyā thī ki dīvār dar na ho jaatī

anā-parast the so baat hī na kī ham ne

tumhāre logoñ kī jādūgarī kā kyā hogā

zamīñ pe pheñk dī apnī agar chhaḌī ham ne

kisī kī ek na chal paa.ī 'ātif' is dil par

ki pahle shaḳhs ko maanā hai āḳhirī ham ne

kahin pe aankh kahin lab pe jaan di hum ne

isi tarah se ganwa di hai zindagi hum ne

tumhaare bare mein kuchh der to ghalat socha

phir apne aap pe talwar tan li hum ne

ye kis maqam pe aa kar hamara zabt gaya

ye kaise shaKHs se sae ki baat ki hum ne

phir us ke ba'd hua yun ki tum kahin na mile

jahan-jahan bhi talashi hai zindagi hum ne

hamein Thikana tha darkar aur use panchhi

so ek peD se kar li hai dosti hum ne

us ek baat pe dukh bhi hua hai hairat bhi

bichhaD ke tum se liye sans waqa'i hum ne

tumhaare shahr mein aise guzara mushkil tha

so apne ruKH se bata di hai sadgi hum ne

majal kya thi ki diwar dar na ho jati

ana-parast the so baat hi na ki hum ne

tumhaare logon ki jadugari ka kya hoga

zamin pe phenk di apni agar chhaDi hum ne

kisi ki ek na chal pai 'atif' is dil par

ki pahle shaKHs ko mana hai aaKHiri hum ne