kahin pe chiKH hogi aur kahin kilkariyan hongi

kahīñ pe chīḳh hogī aur kahīñ kilkāriyāñ hoñgī

agar hākim ke aage bhuuk aur lāchāriyāñ hoñgī

agar har dil meñ chāhat ho sharāfat ho sadāqat ho

mohabbat kā chaman hogā ḳhushī kī kyāriyāñ hoñgī

kisī ko shauq yuuñ hotā nahīñ ġhurbat meñ jiine kā

yaqīnan sāmne us ke baḌī dushvāriyāñ hoñgī

ye holī iid kahtī hai bhalā kab apne hāthoñ meñ

vafā kā rañg hogā pyaar kī pichkāriyāñ hoñgī

muqābil meñ hai aayā ek jugnū aaj sūraj ke

yaqīnan paas us ke bhī baḌī tayyāriyāñ hoñgī

suḳhnavar kā ye āñgan hai 'razā' sheroñ kī ḳhushbū hai

ġhazal aur giit nazmoñ kī yahāñ phul-vāriyāñ hoñgī

kahin pe chiKH hogi aur kahin kilkariyan hongi

agar hakim ke aage bhuk aur lachaariyan hongi

agar har dil mein chahat ho sharafat ho sadaqat ho

mohabbat ka chaman hoga KHushi ki kyariyan hongi

kisi ko shauq yun hota nahin ghurbat mein jine ka

yaqinan samne us ke baDi dushwariyan hongi

ye holi id kahti hai bhala kab apne hathon mein

wafa ka rang hoga pyar ki pichkariyan hongi

muqabil mein hai aaya ek jugnu aaj suraj ke

yaqinan pas us ke bhi baDi tayyariyan hongi

suKHnawar ka ye aangan hai 'raza' sheron ki KHushbu hai

ghazal aur git nazmon ki yahan phul-wariyan hongi