kahin pe qurb ki lazzat ka iqtibas nahin

kahīñ pe qurb kī lazzat kā iqtibās nahīñ

tire ḳhayāl kī ḳhushbū bhī ās-pās nahīñ

hazār baar nigāhoñ se chuum kar dekhā

laboñ pe us ke vo pahlī sī ab miThās nahīñ

sajā ke botaleñ Table pe muntazir hoñ magar

qarīb o duur nigāhoñ ke vo gilās nahīñ

samundaroñ kā ye namkīn paanī kaise piyūñ

piyāsā huuñ magar itnī ziyāda pyaas nahīñ

ye aur baat ki mujh se bichhaḌ ke ḳhush hai magar

vo kaise kah de ki maiñ in dinoñ udaas nahīñ

tumhāre kapḌe kahīñ gard meñ na aT jaa.eñ

ye ḳhushk pattoñ kā bistar hai sabz ghaas nahīñ

bujhī bujhī sahī ye dhuup kam nahīñ 'aslam'

ab is ke ba.ad kisī raushnī kī aas nahīñ

kahin pe qurb ki lazzat ka iqtibas nahin

tere KHayal ki KHushbu bhi aas-pas nahin

hazar bar nigahon se chum kar dekha

labon pe us ke wo pahli si ab miThas nahin

saja ke botalen Table pe muntazir hon magar

qarib o dur nigahon ke wo gilas nahin

samundaron ka ye namkin pani kaise piyun

piyasa hun magar itni ziyaada pyas nahin

ye aur baat ki mujh se bichhaD ke KHush hai magar

wo kaise kah de ki main in dinon udas nahin

tumhaare kapDe kahin gard mein na aT jaen

ye KHushk patton ka bistar hai sabz ghas nahin

bujhi bujhi sahi ye dhup kam nahin 'aslam'

ab is ke baad kisi raushni ki aas nahin