kahin qabil-e-karam hai kahin paikar-e-sitam bhi

kahīñ qābil-e-karam hai kahīñ paikar-e-sitam bhī

yahī zindagī jahannam yahī zindagī iram bhī

maiñ vo harf-e-avvalīñ huuñ na miTā sakā zamāna

ki hazār mujh se uljhe ye jahāñ ke pech-o-ḳham bhī

yahī farq to hai nādāñ tire ġham meñ mere ġham meñ

tujhe dostoñ kā ġham hai mujhe dushmanoñ kā ġham bhī

na ḳhirad hī ham-safar hai na junūñ hī rāhbar hai

ye maqām kaun sā hai yahāñ ruk ga.e qadam bhī

ye ajiib mai-kada hai ki gumān-e-mai-kada hai

yahāñ riñd hosh meñ haiñ yahāñ fikr-e-besh-o-kam bhī

mirī zindagī meñ aisī ka.ī manzileñ bhī aa.iiñ

jahāñ kuchh na kaam aa.ī tirī pursish-e-karam bhī

na milī junūñ meñ 'maikash' mujhe fursat-e-nazāra

sar-e-rāh yuuñ to aa.e ka.ī dair bhī haram bhī

kahin qabil-e-karam hai kahin paikar-e-sitam bhi

yahi zindagi jahannam yahi zindagi iram bhi

main wo harf-e-awwalin hun na miTa saka zamana

ki hazar mujh se uljhe ye jahan ke pech-o-KHam bhi

yahi farq to hai nadan tere gham mein mere gham mein

tujhe doston ka gham hai mujhe dushmanon ka gham bhi

na KHirad hi ham-safar hai na junun hi rahbar hai

ye maqam kaun sa hai yahan ruk gae qadam bhi

ye ajib mai-kada hai ki guman-e-mai-kada hai

yahan rind hosh mein hain yahan fikr-e-besh-o-kam bhi

meri zindagi mein aisi kai manzilen bhi aain

jahan kuchh na kaam aai teri pursish-e-karam bhi

na mili junun mein 'maikash' mujhe fursat-e-nazara

sar-e-rah yun to aae kai dair bhi haram bhi