kahin sar paTakte diwane kahin par jhulaste parwane

kahīñ sar paTakte dīvāne kahīñ par jhulaste parvāne

jo ho be-shu'ūr kyā jaane ye haiñ zindagī ke afsāne

ye na.ī na.ī har ik sūrat ye tilismī ā.īna-ḳhāne

hai ġhazab kī sho'la-sāmānī ki bhaTak rahe haiñ parvāne

sabhī apne aur begāne chale aa rahe haiñ samjhāne

mujhe kyā huā ḳhudā jaane maiñ siḌī huuñ yā ye dīvāne

koī aa rahā hai samjhāne magar is tarah ki be-jāne

haiñ usī ke ġham meñ dīvāne abhī sun le to burā maane

lalak ek sī na ai koyal na tirā sā dil hai merā dil

tirī kuuk ko maiñ kyā samjhūñ mirī huuk ko tū kyā jaane

tirī be-ruḳhī ne ai saaqī havas-e-talab baḌhā dī hai

huā chuur ek paimāna to bane hazār paimāne

hai idhar ḳhumār āñkhoñ meñ udhar intizār āñkhoñ meñ

abhī daur-e-mai-kashī hai duur abhī ban rahe haiñ maiḳhāne

huā bhole-pan pe jo bismil vo to apnā aap hai qātil

ye samajh kā pher hai ai dil sitam-o-jafā vo kyā jaane

na.ī karvaTeñ zamāne kī haiñ baḌī hī inqalābātī

kahīñ bastiyoñ meñ vīrānī kahīñ bas rahe haiñ vīrāne

ye ubhartī miTtī tahrīreñ ye bigaḌtī bantī tasvīreñ

kisī husn kī haiñ tanvīreñ koī dekhe ho to pahchāne

tū hai jān-e-husn ye sun ke to pasīna chhūTā māthe se

mirā naam 'ārzū' sun le to vo aur bhī burā maane

kahin sar paTakte diwane kahin par jhulaste parwane

jo ho be-shu'ur kya jaane ye hain zindagi ke afsane

ye nai nai har ek surat ye tilismi aaina-KHane

hai ghazab ki sho'la-samani ki bhaTak rahe hain parwane

sabhi apne aur begane chale aa rahe hain samjhane

mujhe kya hua KHuda jaane main siDi hun ya ye diwane

koi aa raha hai samjhane magar is tarah ki be-jaane

hain usi ke gham mein diwane abhi sun le to bura mane

lalak ek si na ai koyal na tera sa dil hai mera dil

teri kuk ko main kya samjhun meri huk ko tu kya jaane

teri be-ruKHi ne ai saqi hawas-e-talab baDha di hai

hua chur ek paimana to bane hazar paimane

hai idhar KHumar aankhon mein udhar intizar aankhon mein

abhi daur-e-mai-kashi hai dur abhi ban rahe hain maiKHane

hua bhole-pan pe jo bismil wo to apna aap hai qatil

ye samajh ka pher hai ai dil sitam-o-jafa wo kya jaane

nai karwaTen zamane ki hain baDi hi inqalabaati

kahin bastiyon mein virani kahin bas rahe hain virane

ye ubharti miTti tahriren ye bigaDti banti taswiren

kisi husn ki hain tanwiren koi dekhe ho to pahchane

tu hai jaan-e-husn ye sun ke to pasina chhuTa mathe se

mera nam 'arzu' sun le to wo aur bhi bura mane