kahin shab ke canwas par naya din ubhar raha hai

kahīñ shab ke canvas par nayā din ubhar rahā hai

mirā dāġh-e-nā-rasā.ī mirā naqsh ban gayā hai

maiñ chalā huuñ jangaloñ se kisī bāġh-e-ātishīñ tak

mirā zaad ḳhār-o-ḳhas hai mirā rang uḌā huā hai

jo hai bazm ham se ḳhālī vo rahegī ġham se ḳhālī

jo jagah ḳhushī se pur hai vo hamārā hī ḳhalā hai

abhī dekhiyegā har-sū mirā ḳhāk-bos honā

ki havā.eñ chal paḌī haiñ zar-e-gul bikhar chalā hai

dam-e-rafta kī sifat hai shab-o-roz meñ na honā

jahāñ vaqt chal rahā hai vahāñ merā kaam kyā hai

maiñ yakāyak apne ġham se tire ġham meñ aa gayā huuñ

abhī dhuup paḌ rahī thī abhī meñh baras rahā hai

mirā bā.is-e-numū hai tire ġham kī zahr-nākī

jo fazāoñ meñ dhuāñ hai vo daraḳht kī ġhizā hai

mutaharrik is qadar hai mirā gard-bād-e-hastī

koī duur se jo dekhe to lage rukā huā hai

kahīñ chāñd kī kashish se huā madd-o-jazr paidā

kisī tāb-e-ruḳh se mujh meñ ye talātum uTh rahā hai

jise aap kah rahe haiñ ki ġhilāf hai havā kā

vo zamīñ ke chaar jānib mirī aah kī fazā hai

inhī dil kī saḳhtiyoñ se kabhī ashk ubal paḌeñge

ki jahāñ pahāḌiyāñ hoñ vahīñ chashma phūTtā hai

kahīñ misl-e-ā.ina haiñ mutavāzī kā.enāteñ

vahāñ ek aadmī hai jo hamārī shakl kā hai

vo jo vast-e-sīna meñ hai vo fazā nahīñ kahīñ bhī

vahāñ mausam aur kuchh hai jahāñ ḳhatt-e-istavā hai

maiñ paḌā huā huuñ ḳhud meñ kahīñ be vajūd 'shāhid'

mirī ruuh gum-shuda hai mirā jism lāpata hai

kahin shab ke canwas par naya din ubhar raha hai

mera dagh-e-na-rasai mera naqsh ban gaya hai

main chala hun jangalon se kisi bagh-e-atishin tak

mera zad KHar-o-KHas hai mera rang uDa hua hai

jo hai bazm hum se KHali wo rahegi gham se KHali

jo jagah KHushi se pur hai wo hamara hi KHala hai

abhi dekhiyega har-su mera KHak-bos hona

ki hawaen chal paDi hain zar-e-gul bikhar chala hai

dam-e-rafta ki sifat hai shab-o-roz mein na hona

jahan waqt chal raha hai wahan mera kaam kya hai

main yakayak apne gham se tere gham mein aa gaya hun

abhi dhup paD rahi thi abhi meinh baras raha hai

mera bais-e-numu hai tere gham ki zahr-naki

jo fazaon mein dhuan hai wo daraKHt ki ghiza hai

mutaharrik is qadar hai mera gard-baad-e-hasti

koi dur se jo dekhe to lage ruka hua hai

kahin chand ki kashish se hua madd-o-jazr paida

kisi tab-e-ruKH se mujh mein ye talatum uTh raha hai

jise aap kah rahe hain ki ghilaf hai hawa ka

wo zamin ke chaar jaanib meri aah ki faza hai

inhi dil ki saKHtiyon se kabhi ashk ubal paDenge

ki jahan pahaDiyan hon wahin chashma phuTta hai

kahin misl-e-aina hain mutawazi kaenaten

wahan ek aadmi hai jo hamari shakl ka hai

wo jo wast-e-sina mein hai wo faza nahin kahin bhi

wahan mausam aur kuchh hai jahan KHatt-e-istawa hai

main paDa hua hun KHud mein kahin be wajud 'shahid'

meri ruh gum-shuda hai mera jism lapata hai