kahin shoala kahin KHakistar-e-taza nazar aaya

kahīñ sho.ala kahīñ ḳhākistar-e-tāza nazar aayā

vahāñ maiñ thā jahāñ phūloñ kā darvāza nazar aayā

bahaktī haiñ havā.eñ phuul be-mausam bhī khilte haiñ

jahān-e-āb-o-gil ham ko ba-andāza nazar aayā

havā kī zahr-nākī abr-e-nā-rafta kī saffākī

mujhe aksar vidā-e-gul kā ḳhamyāza nazar aayā

udāsī thī ki thā ik jalva-e-sad-rañg-o-bū shāyad

dil-e-be-rañg bhī rañgoñ kā shīrāza nazar aayā

shajar kā aks thā āb-e-ravāñ thā aur maiñ bhī thā

samar shāḳh-e-burīda kā tar-o-tāza nazar aayā

zabāñ kā husn bhī hamvār-o-nā-hamvār hotā hai

kahīñ fitrat nazar aa.ī kahīñ ġhāza nazar aayā

kahin shoala kahin KHakistar-e-taza nazar aaya

wahan main tha jahan phulon ka darwaza nazar aaya

bahakti hain hawaen phul be-mausam bhi khilte hain

jahan-e-ab-o-gil hum ko ba-andaza nazar aaya

hawa ki zahr-naki abr-e-na-rafta ki saffaki

mujhe aksar wida-e-gul ka KHamyaza nazar aaya

udasi thi ki tha ek jalwa-e-sad-rang-o-bu shayad

dil-e-be-rang bhi rangon ka shiraaza nazar aaya

shajar ka aks tha aab-e-rawan tha aur main bhi tha

samar shaKH-e-burida ka tar-o-taza nazar aaya

zaban ka husn bhi hamwar-o-na-hamwar hota hai

kahin fitrat nazar aai kahin ghaza nazar aaya