kahin uDa na le jaen ye aandhiyan mujhko

kahīñ uḌā na le jaa.eñ ye āñdhiyāñ mujh ko

chhupā le bādaloñ meñ aaj āsmāñ mujh ko

jo kar chukā hai jalā kar kabhī dhuāñ mujh ko

vo aaj DhūñDh rahā thā yahāñ-vahāñ mujh ko

ye bār-bār chalī aatī haiñ jo paas mire

samajhtī haiñ koī sāhil ye kashtiyāñ mujh ko

mahak gulāb ke jaisī hai tere chhūne meñ

talāsh kartī rahīñ kitnī titliyāñ mujh ko

chhupātā phirtā rahā 'ishq jo zamāna se

mile haiñ us kī mohabbat ke kuchh nishāñ mujh ko

ab ik taraf hai vafā aur ik taraf hai qazā

ḳhudā ne rakkhā kahāñ in ke darmiyāñ mujh ko

koī to yaad yahāñ kartā rahtā hai 'sāgar'

jo kar rahī haiñ pareshān hichkiyāñ mujh ko

kahin uDa na le jaen ye aandhiyan mujh ko

chhupa le baadalon mein aaj aasman mujh ko

jo kar chuka hai jala kar kabhi dhuan mujh ko

wo aaj DhunDh raha tha yahan-wahan mujh ko

ye bar-bar chali aati hain jo pas mere

samajhti hain koi sahil ye kashtiyan mujh ko

mahak gulab ke jaisi hai tere chhune mein

talash karti rahin kitni titliyan mujh ko

chhupata phirta raha 'ishq jo zamana se

mile hain us ki mohabbat ke kuchh nishan mujh ko

ab ek taraf hai wafa aur ek taraf hai qaza

KHuda ne rakkha kahan in ke darmiyan mujh ko

koi to yaad yahan karta rahta hai 'sagar'

jo kar rahi hain pareshan hichkiyan mujh ko