kahin ye KHwab mera zindagi na ban jae

kahīñ ye ḳhvāb mirā zindagī na ban jaa.e

charāġh bujhtā huā raushnī na ban jaa.e

maiñ is ḳhayāl se rotā nahīñ huuñ sahrā meñ

kahīñ ye dasht kisī din nadī na ban jaa.e

irāda kar to rahe ho use chalāne kā

magar ye tiir tumhārā hañsī na ban jaa.e

azāb-e-vasl gavārā to hai hameñ lekin

ye ek lamha rahe ik sadī na ban jaa.e

ajiib rang haiñ khīñche hī jā rahe haiñ mujhe

jo maiñ banātā nahīñ huuñ vahī na ban jaa.e

samundaroñ meñ jise maiñ ne bahte dekhā hai

mirā nasīb vo tishna-labī na ban jaa.e

bhaTak rahā hai bahut rāt-din koī mahtāb

makān us kā kahīñ be-gharī na ban jaa.e

tamām-umr jo tanhā.ī meñ rahā merī

vo anjuman meñ kahīñ ajnabī na ban jaa.e

usī ḳhayāl se toḌe ga.e sabhī kashkol

hamāre shahr meñ koī saḳhī ban jaa.e

kahin ye KHwab mera zindagi na ban jae

charagh bujhta hua raushni na ban jae

main is KHayal se rota nahin hun sahra mein

kahin ye dasht kisi din nadi na ban jae

irada kar to rahe ho use chalane ka

magar ye tir tumhaara hansi na ban jae

azab-e-wasl gawara to hai hamein lekin

ye ek lamha rahe ek sadi na ban jae

ajib rang hain khinche hi ja rahe hain mujhe

jo main banata nahin hun wahi na ban jae

samundaron mein jise main ne bahte dekha hai

mera nasib wo tishna-labi na ban jae

bhaTak raha hai bahut raat-din koi mahtab

makan us ka kahin be-ghari na ban jae

tamam-umr jo tanhai mein raha meri

wo anjuman mein kahin ajnabi na ban jae

usi KHayal se toDe gae sabhi kashkol

hamare shahr mein koi saKHi ban jae