kahkashan ko toD kar sare ke sare aa gae

kahkashāñ ko toḌ kar saare ke saare aa ga.e

chāñd ko maiñ ne pukārā thā sitāre aa ga.e

sar-phire sūraj ke marne kā tamāsha dekhne

shaam ke manzar bhī bāloñ ko sañvāre aa ga.e

yaad jab maiñ ne kiyā un ko bhare mañjdhār meñ

ḳhud-ba-ḳhud kashtī meñ chal kar ye kināre aa ga.e

haañ yahī sach hai bichhaḌte vaqt apnī aañkh meñ

un kī galiyoñ ke liye rangīñ nazāre aa ga.e

prem-dhan kī bāñsurī aisī bajā.ī shyām ne

nafratoñ ke devtā bhī muñh utāre aa ga.e

mai-kashoñ kī bazm meñ thā ranj-o-ġham par tabsira

maiñ ne dī āvāz sab ulfat ke maare aa ga.e

hamd likhne ko qalam jab bhī uThā.ī hai 'shikhā'

lafz saare bā-adab bāñheñ pasāre aa ga.e

kahkashan ko toD kar sare ke sare aa gae

chand ko main ne pukara tha sitare aa gae

sar-phire suraj ke marne ka tamasha dekhne

sham ke manzar bhi baalon ko sanware aa gae

yaad jab main ne kiya un ko bhare manjdhaar mein

KHud-ba-KHud kashti mein chal kar ye kinare aa gae

han yahi sach hai bichhaDte waqt apni aankh mein

un ki galiyon ke liye rangin nazare aa gae

prem-dhan ki bansuri aisi bajai shyam ne

nafraton ke dewta bhi munh utare aa gae

mai-kashon ki bazm mein tha ranj-o-gham par tabsira

main ne di aawaz sab ulfat ke mare aa gae

hamd likhne ko qalam jab bhi uThai hai 'shikha'

lafz sare ba-adab banhen pasare aa gae