kahkashan phul saba aur na jaane kya kya

kahkashāñ phuul sabā aur na jaane kyā kyā

ham tire shahr ko laa.e haiñ sajāne kyā kyā

besh-qīmat hai tirī ḳhaak javāhar se bhī

dafn āġhosh meñ tere haiñ ḳhazāne kyā kyā

haft-rangī hai tirā pairahan-e-dil-āvez

tū ne dekhe haiñ dhanak-rang zamāne kyā kyā

merī āñkhoñ meñ simaT aa.e haiñ manzar kaise

mere hoñToñ pe machalte haiñ tarāne kyā kyā

mere bachpan kā asāsa mere purkhoñ kā vaqār

tū ne dāman meñ chhupā rakkhā hai jaane kyā kyā

shahr-e-dildār se is qarya-e-nā-pursāñ tak

har qadam chhoḌ ke aa.e haiñ ḳhazāne kyā kyā

tum ne yuuñ pūchhā mirā haal ki dil bhar aayā

phir se lau dene lage daaġh purāne kyā kyā

alf-lailā tirī ab tak yūñhī jaarī saarī

ham sunāte haiñ tire sab ko fasāne kyā kyā

kyā batā.eñ tirī bāñhoñ meñ samāne ke liye

ham sadā DhūñDte rahte haiñ bahāne kyā kyā

kahkashan phul saba aur na jaane kya kya

hum tere shahr ko lae hain sajaane kya kya

besh-qimat hai teri KHak jawahar se bhi

dafn aaghosh mein tere hain KHazane kya kya

haft-rangi hai tera pairahan-e-dil-awez

tu ne dekhe hain dhanak-rang zamane kya kya

meri aankhon mein simaT aae hain manzar kaise

mere honTon pe machalte hain tarane kya kya

mere bachpan ka asasa mere purkhon ka waqar

tu ne daman mein chhupa rakkha hai jaane kya kya

shahr-e-dildar se is qarya-e-na-pursan tak

har qadam chhoD ke aae hain KHazane kya kya

tum ne yun puchha mera haal ki dil bhar aaya

phir se lau dene lage dagh purane kya kya

alf-laila teri ab tak yunhi jari sari

hum sunate hain tere sab ko fasane kya kya

kya bataen teri banhon mein samane ke liye

hum sada DhunDte rahte hain bahane kya kya