kahne ko humne yun to kai sher kah diye

kahne ko ham ne yuuñ to ka.ī sher kah diye

lekin ye dil kahe ki abhī kuchh na kah sake

chehre pe apne phir se zarā ġhaur kījiye

ab vo bhī sach kahāñ hai jo kuchh aa.ina kahe

kaise kahūñ ki mere paḌosī haiñ shādmāñ

dīvār darmiyāñ thī faqat qahqahe sune

mujh ko yaqīn hai ki mirī yaad aa.egī

manzil se ruuTh jā.eñge jis vaqt rāste

sachchā.ī phuul ban ke to mahkī nahīñ magar

kuchh ḳhaar ham ne apnī zabāñ meñ chubho liye

ye husn-e-ittifāq hai phir mil ga.e 'nizām'

ab koī baat mūjib-e-ranjish na ban sake

kahne ko hum ne yun to kai sher kah diye

lekin ye dil kahe ki abhi kuchh na kah sake

chehre pe apne phir se zara ghaur kijiye

ab wo bhi sach kahan hai jo kuchh aaina kahe

kaise kahun ki mere paDosi hain shadman

diwar darmiyan thi faqat qahqahe sune

mujh ko yaqin hai ki meri yaad aaegi

manzil se ruTh jaenge jis waqt raste

sachchai phul ban ke to mahki nahin magar

kuchh KHar hum ne apni zaban mein chubho liye

ye husn-e-ittifaq hai phir mil gae 'nizam'

ab koi baat mujib-e-ranjish na ban sake