kahne se ghair ke na karen imtihan aap

kahne se ġhair ke na kareñ imtihān aap

pachhtā.eñge vagarna bahut merī jaan aap

be-jurm ham se ho ke ḳhafā mehrbān aap

chhuḌvāte haiñ ḳhudā kī qasam apnā dhyān aap

maiñ aur shikva aap kā ġhairoñ ke sāmne

ye vahm ye ḳhyāl-e-bad aur ye gumān aap

ai ishq tāb-e-sadma-e-ġham mujh meñ ab nahīñ

bezār zindagī se huuñ maiñ nā-tavān aap

mar-mar ke ham ne rashk-e-masīhā kiyā tumheñ

ham se rakheñ dimāġh sar-e-āsmān aap

shāyad sitam se haath uThāyā raqīb ne

rahte haiñ mere haal pe jo mehrbān aap

ham kyoñ ilaaj sīna-e-majrūh kā kareñ

jaate raheñge zaḳhm-e-jigar ke nishān aap

dām-e-balā-e-zulf meñ dil ko phañsā.ūñ kyoñ

Dālūñ maiñ is azaab meñ kyoñ apnī jaan aap

manzūr hai tumhīñ ko jalānā mirā jo roz

karte haiñ ishq-e-ġhair kā aakar bayān aap

vo shoḳh pur-jafā-o-sitam aur ḳhudā kā Dar

rakhte haiñ apne dil meñ 'hayā' kyā gumān aap

kahne se ghair ke na karen imtihan aap

pachhtaenge wagarna bahut meri jaan aap

be-jurm hum se ho ke KHafa mehrban aap

chhuDwate hain KHuda ki qasam apna dhyan aap

main aur shikwa aap ka ghairon ke samne

ye wahm ye KHyal-e-bad aur ye guman aap

ai ishq tab-e-sadma-e-gham mujh mein ab nahin

bezar zindagi se hun main na-tawan aap

mar-mar ke hum ne rashk-e-masiha kiya tumhein

hum se rakhen dimagh sar-e-asman aap

shayad sitam se hath uThaya raqib ne

rahte hain mere haal pe jo mehrban aap

hum kyon ilaj sina-e-majruh ka karen

jate rahenge zaKHm-e-jigar ke nishan aap

dam-e-bala-e-zulf mein dil ko phansaun kyon

Dalun main is azab mein kyon apni jaan aap

manzur hai tumhin ko jalana mera jo roz

karte hain ishq-e-ghair ka aakar bayan aap

wo shoKH pur-jafa-o-sitam aur KHuda ka Dar

rakhte hain apne dil mein 'haya' kya guman aap