kahne wale zaKHmi hain sunne wale ghail hain

kahne vaale zaḳhmī haiñ sunñe vaale ghā.il haiñ

tere paas ai duniyā kis qadar masā.il haiñ

maslahat ne baḳhshī hai dohrī shaḳhsiyat ham ko

dostī ke qaa.il haiñ dushmanī pe maa.il haiñ

ḳhushk-lab zamīnoñ se kis tarah mileñ bādal

mausamoñ kī dīvāreñ rāstoñ meñ haa.il haiñ

aql kī kamānoñ meñ tiir joḌ kar ulTe

ham shikār kī dhun meñ ḳhud-kushī pe maa.il haiñ

justujū na.e-pan kī irtiqā kā mehvar hai

ham bhī is maqūle ke ai 'hayāt' qaa.il haiñ

kahne wale zaKHmi hain sunne wale ghail hain

tere pas ai duniya kis qadar masail hain

maslahat ne baKHshi hai dohri shaKHsiyat hum ko

dosti ke qail hain dushmani pe mail hain

KHushk-lab zaminon se kis tarah milen baadal

mausamon ki diwaren raston mein hail hain

aql ki kamanon mein tir joD kar ulTe

hum shikar ki dhun mein KHud-kushi pe mail hain

justuju nae-pan ki irtiqa ka mehwar hai

hum bhi is maqule ke ai 'hayat' qail hain