kahni hai koi baat to mujhse kaha karen

kahnī hai koī baat to mujh se kahā kareñ

har 'ām-o-tām se na mirā tazkira kareñ

kahtī hai shab-navardī ki tanhā guzāreñ raat

tanhā.ī kah rahī hai chalo rābta kareñ

bashindagān-e-shahr haiñ pahle se bad-gumān

raa.ī ko dhun ke aur na parbat khaḌā kareñ

bahrūpiyoñ ke shahr meñ khoyā hai merā dost

mardum-shanās jo bhī haiñ chal kar pata kareñ

zindān-e-ishtiyāq meñ jis ne guzārī hai

āñkhoñ ko us ke chuum leñ panchhī rihā kareñ

baiThā hai ek vahshī parinda jo peḌ par

vo chāhtā hai ruuh ko tan se judā kareñ

ham ko udāsiyoñ se pare aur bhī haiñ kaam

kyūñkar darūn-e-zāt se har dam laḌā kareñ

kahni hai koi baat to mujh se kaha karen

har 'am-o-tam se na mera tazkira karen

kahti hai shab-nawardi ki tanha guzaren raat

tanhai kah rahi hai chalo rabta karen

bashindagan-e-shahr hain pahle se bad-guman

rai ko dhun ke aur na parbat khaDa karen

bahrupiyon ke shahr mein khoya hai mera dost

mardum-shanas jo bhi hain chal kar pata karen

zindan-e-ishtiyaq mein jis ne guzari hai

aankhon ko us ke chum len panchhi riha karen

baiTha hai ek wahshi parinda jo peD par

wo chahta hai ruh ko tan se juda karen

hum ko udasiyon se pare aur bhi hain kaam

kyunkar darun-e-zat se har dam laDa karen