kaho ki tur pe jalta rahe charagh abhi

kaho ki tuur pe jaltā rahe charāġh abhī

mujhe sharāb se hāsil nahīñ farāġh abhī

abhī to bāda-parastī mirī shabāb pe hai

ravish ravish hai mire dam se baaġh baaġh abhī

jo sub.h-e-vasl tire gesuoñ se Tapkī thī

mahak rahā hai usī baaġh se dimāġh abhī

qayām-e-hashr zarā aur multavī kar do

ki mai-kade meñ khanakte haiñ kuchh ayāġh abhī

abhī jahannam-e-duniyā meñ aur jalne do

mirī jabīn-e-baġhāvat hai daaġh daaġh abhī

nahīñ hai fursat-e-tauba sharāb se 'maz.har'

ki faiz-e-yār se labrez hai ayāġh abhī

kaho ki tur pe jalta rahe charagh abhi

mujhe sharab se hasil nahin faragh abhi

abhi to baada-parasti meri shabab pe hai

rawish rawish hai mere dam se bagh bagh abhi

jo subh-e-wasl tere gesuon se Tapki thi

mahak raha hai usi bagh se dimagh abhi

qayam-e-hashr zara aur multawi kar do

ki mai-kade mein khanakte hain kuchh ayagh abhi

abhi jahannam-e-duniya mein aur jalne do

meri jabin-e-baghawat hai dagh dagh abhi

nahin hai fursat-e-tauba sharab se 'mazhar'

ki faiz-e-yar se labrez hai ayagh abhi