kahte hain rahguzar hai teri dil kahen jise

kahte haiñ rahguzar hai tirī dil kaheñ jise

phir kaun sā maqām hai manzil kaheñ jise

is jalva-gāh-e-dahr meñ ik jalva bhī nahīñ

mere mazāq-e-dīd ke qābil kaheñ jise

kaisī bahār-e-lāla-o-gul kaise mehr-o-māh

aisā hai kaun terā muqābil kaheñ jise

yuuñ to sabhī haiñ dard-e-mohabbat se faiz-yāb

dil ham usī ko samjheñge vo dil kaheñ jise

hogā vo koī aur yaqīnan vo tum nahīñ

hāl-e-tabāh se mire ġhāfil kaheñ jise

nākām hasratoñ ne use aur dī jilā

vo dāġh-e-yādgār ġham-e-dil kaheñ jise

haañ tum vafā-parast ho dil se mujhe qubūl

vo to kaho vo kaun hai qātil kaheñ jise

tārāj-e-ġham se dil bhī to vīrān ho chukā

kahiye kahāñ hai aap kī manzil kaheñ jise

kahte hain rahguzar hai teri dil kahen jise

phir kaun sa maqam hai manzil kahen jise

is jalwa-gah-e-dahr mein ek jalwa bhi nahin

mere mazaq-e-did ke qabil kahen jise

kaisi bahaar-e-lala-o-gul kaise mehr-o-mah

aisa hai kaun tera muqabil kahen jise

yun to sabhi hain dard-e-mohabbat se faiz-yab

dil hum usi ko samjhenge wo dil kahen jise

hoga wo koi aur yaqinan wo tum nahin

haal-e-tabah se mere ghafil kahen jise

nakaam hasraton ne use aur di jila

wo dagh-e-yaadgar gham-e-dil kahen jise

han tum wafa-parast ho dil se mujhe qubul

wo to kaho wo kaun hai qatil kahen jise

taraj-e-gham se dil bhi to viran ho chuka

kahiye kahan hai aap ki manzil kahen jise