kahun duniya mein ab main kis se ja kar

kahūñ duniyā meñ ab maiñ kis se jā kar

agar karnā hai kuchh thoḌī vafā kar

hamāre baḳht meñ aañsū nahīñ haiñ

koī hāsil nahīñ dariyā bahā kar

maiñ ḳhālī chashm lauT aaya dobāra

tū dariyā hai to do aañsū atā kar

ye duniyā ho ki uqbā imtihāñ hai

koī gosha pakaḌ ḳhud ko paḌhā kar

na hāsil kā na ġham lā-hāsilī kā

uThā haath apne aur ḳhālī duā kar

maiñ ashraf bhī yahāñ barbād bhī huuñ

vo be-shak ḳhush hai ye duniyā basā kar

shikasta dil kā jis dam naaz TuuTā

tapish sī rah ga.ī sham.eñ bujhā kar

maiñ pheñk aaya huuñ dil dasht-e-nahī meñ

ab ik qissa hai chāhe to sunā kar

gila kyā kījiye is zindagī se

milī hasrat tamannā.eñ sajā kar

kabhī hotā thā aaqā bahr-o-bar kā

magar ab vo hai san.at-gar kā chākar

pukārā thā ise ābād kar de

vo jaatā hai hamāre dil ko Dhā kar

hai ansārī to phir ye māñgnā kyā

akele meñ kahīñ tanhā sadā kar

kahun duniya mein ab main kis se ja kar

agar karna hai kuchh thoDi wafa kar

hamare baKHt mein aansu nahin hain

koi hasil nahin dariya baha kar

main KHali chashm lauT aaya dobara

tu dariya hai to do aansu ata kar

ye duniya ho ki uqba imtihan hai

koi gosha pakaD KHud ko paDha kar

na hasil ka na gham la-hasili ka

uTha hath apne aur KHali dua kar

main ashraf bhi yahan barbaad bhi hun

wo be-shak KHush hai ye duniya basa kar

shikasta dil ka jis dam naz TuTa

tapish si rah gai shamen bujha kar

main phenk aaya hun dil dasht-e-nahi mein

ab ek qissa hai chahe to suna kar

gila kya kijiye is zindagi se

mili hasrat tamannaen saja kar

kabhi hota tha aaqa bahr-o-bar ka

magar ab wo hai sanat-gar ka chaakar

pukara tha ise aabaad kar de

wo jata hai hamare dil ko Dha kar

hai ansari to phir ye mangna kya

akele mein kahin tanha sada kar