kahun kis se ba-juz tere KHudaya aarzu dil ki

kahūñ kis se ba-juz tere ḳhudāyā aarzū dil kī

murād apnī hamesha tujh se hī bas maiñ ne hāsil kī

sañbhalnā hotā mushkil ġhair hālat hotī qātil kī

bahut achchhā huā dekhī taḌap us ne na bismil kī

tū hī ma.abūd hai merā tū hī matlūb hai merā

yahī matlūb hai mujh ko tamanna hai yahī dil kī

ġharaz tauf-e-haram se kyā har ik zarre meñ hai jalva

zarūrat kuchh nahīñ sālik ko is vīrān manzil kī

agar chāhe ki auj-e-baḳht hāsil ho nasīhat sun

vafūr-e-ḳhāksārī se ye daulat sab ne hāsil kī

ġhazab hai imtihāñ meñ mere aage qatl ho koī

gale par pher lūñgā chhīn kar talvār qātil kī

ḳhizāñ meñ dekh kar rang-e-chaman kyā ranj hotā hai

dukhā detī haiñ dil ko haa.e fariyādeñ anādil kī

zarā Thahro farishto kuchh to yaañ ārām lene do

uThā kar aa rahā huuñ saḳhtiyāñ hastī kī manzil kī

kabhī bechain rahtā hai phaḌaktā hai kabhī bar meñ

batā.ūñ kyā tumheñ maiñ kaisī hālat hai mire dil kī

makāñ meñ mere tum aa.e baḌī ye mehrbānī kī

yahī ḳhvāhish tamanna bhī yahī thī bas mire dil kī

jise sab 'shād' kahte haiñ tire dar kā bhikārī hai

karegā tū hī yā-rab puurī hājat apne saa.il kī

kahun kis se ba-juz tere KHudaya aarzu dil ki

murad apni hamesha tujh se hi bas main ne hasil ki

sanbhalna hota mushkil ghair haalat hoti qatil ki

bahut achchha hua dekhi taDap us ne na bismil ki

tu hi mabud hai mera tu hi matlub hai mera

yahi matlub hai mujh ko tamanna hai yahi dil ki

gharaz tauf-e-haram se kya har ek zarre mein hai jalwa

zarurat kuchh nahin salik ko is viran manzil ki

agar chahe ki auj-e-baKHt hasil ho nasihat sun

wafur-e-KHaksari se ye daulat sab ne hasil ki

ghazab hai imtihan mein mere aage qatl ho koi

gale par pher lunga chhin kar talwar qatil ki

KHizan mein dekh kar rang-e-chaman kya ranj hota hai

dukha deti hain dil ko hae fariyaaden anadil ki

zara Thahro farishto kuchh to yan aaram lene do

uTha kar aa raha hun saKHtiyan hasti ki manzil ki

kabhi bechain rahta hai phaDakta hai kabhi bar mein

bataun kya tumhein main kaisi haalat hai mere dil ki

makan mein mere tum aae baDi ye mehrbani ki

yahi KHwahish tamanna bhi yahi thi bas mere dil ki

jise sab 'shad' kahte hain tere dar ka bhikari hai

karega tu hi ya-rab puri hajat apne sail ki