kahun kis se ki dhundlae hue hain

kahūñ kis se ki dhuñdlā.e hue haiñ

jo manzar aañkh par chhā.e hue haiñ

kināre se kināre tak hai vahshat

nadī ke raag ghabrā.e hue haiñ

kuchh aise ḳhvāb jin se Dar rahā huuñ

guzishta raat se aa.e hue haiñ

kabhī tū bhī hamārī samt aatā

tirī jānib to ham aa.e hue haiñ

ḳhulūs-e-dil sahī terā tabassum

magar ham choT to khaa.e hue haiñ

na-jāne raat kaun aa.egā chhat par

sitāre shaam se aa.e hue haiñ

muqaddas ham sahīfe haiñ jo shāyad

hazāroñ baar jhuTlā.e hue haiñ

hamārā zikr ho to jaan liijo

tirī mahfil meñ ham aa.e hue haiñ

baḌe daanā haiñ jī dushman hamāre

magar zid par abhī aa.e hue haiñ

raqīboñ par bhī hai nazr-e-‘ināyat

karam ham par bhī farmā.e hue haiñ

hamārā ban ke tū bhī to rahā thā

tire ham bhī kabhī haa.e hue haiñ

sukūn-o-amn vaqtī hī rahā hai

musalsal ḳhauf ke saa.e hue haiñ

dimāġhī 'āriza lāhaq hai tum ko

ka.ī dil haiñ jo ghabrā.e hue haiñ

hameñ 'ārif' guloñ se nisbateñ thiiñ

magar kāñToñ meñ ginvā.e hue haiñ

kahun kis se ki dhundlae hue hain

jo manzar aankh par chhae hue hain

kinare se kinare tak hai wahshat

nadi ke rag ghabrae hue hain

kuchh aise KHwab jin se Dar raha hun

guzishta raat se aae hue hain

kabhi tu bhi hamari samt aata

teri jaanib to hum aae hue hain

KHulus-e-dil sahi tera tabassum

magar hum choT to khae hue hain

na-jaane raat kaun aaega chhat par

sitare sham se aae hue hain

muqaddas hum sahife hain jo shayad

hazaron bar jhuTlae hue hain

hamara zikr ho to jaan lijo

teri mahfil mein hum aae hue hain

baDe dana hain ji dushman hamare

magar zid par abhi aae hue hain

raqibon par bhi hai nazr-e-‘inayat

karam hum par bhi farmae hue hain

hamara ban ke tu bhi to raha tha

tere hum bhi kabhi hae hue hain

sukun-o-amn waqti hi raha hai

musalsal KHauf ke sae hue hain

dimaghi 'ariza lahaq hai tum ko

kai dil hain jo ghabrae hue hain

hamein 'arif' gulon se nisbaten thin

magar kanTon mein ginwae hue hain