kaif-o-masti ki faza chhai jo maiKHane mein thi

kaif-o-mastī kī fazā chhā.ī jo maiḳhāne meñ thī

kyā ḳhatā apnī vahāñ pī kar bahak jaane meñ thī

mimbar-o-mehrāb par kab thī tajallī nuur kī

mah-vashoñ ke darmiyāñ miinā meñ maiḳhāne meñ thī

ilm-o-hikmat par bhī chhā.īñ jehl kī tārīkiyāñ

āgahī kī raushnī bas dil ke vīrāne meñ thī

apnī shartoñ par basar kī us ne apnī zindagī

ek shān-e-kibriyā.ī tere dīvāne meñ thī

bhūlnā ġham kā na thā maqsūd apnā jab talak

baat tab kuchh aur hī pī kar bahak jaane meñ thī

qaid meñ dīvāna thā āzadiyoñ ke darmiyāñ

ḳhud thā zindāñ meñ magar zanjīr vīrāne meñ thī

haath kyoñ baḌhtā kisī jām-e-masarrat ke liye

pī sake utnī bhī kab apne jo paimāne meñ thī

kaif-o-masti ki faza chhai jo maiKHane mein thi

kya KHata apni wahan pi kar bahak jaane mein thi

mimbar-o-mehrab par kab thi tajalli nur ki

mah-washon ke darmiyan mina mein maiKHane mein thi

ilm-o-hikmat par bhi chhain jehl ki tarikiyan

aagahi ki raushni bas dil ke virane mein thi

apni sharton par basar ki us ne apni zindagi

ek shan-e-kibriyai tere diwane mein thi

bhulna gham ka na tha maqsud apna jab talak

baat tab kuchh aur hi pi kar bahak jaane mein thi

qaid mein diwana tha aazadiyon ke darmiyan

KHud tha zindan mein magar zanjir virane mein thi

hath kyon baDhta kisi jam-e-masarrat ke liye

pi sake utni bhi kab apne jo paimane mein thi