kaifiyat-e-dil-e-hazin humse nahin bayan hui

kaifiyat-e-dil-e-hazīñ ham se nahīñ bayāñ huī

lafz na saath de sake āñsuoñ se ayaañ huī

shorish-e-vārdāt-e-qalb sheroñ meñ Dhaal Dhaal kar

likhte rahe tamām umr ḳhatm na dāstāñ huī

ab na vo dil meñ dhaḌkaneñ ab na vo soz-o-sāz hai

pūchhte haiñ vafāt-e-dil kaise huī kahāñ huī

merī zarā sī baat par jaane vo kyuuñ ḳhafā huī

koī na talḳh guftugū donoñ ke darmiyāñ huī

ghar to hazāroñ ban ga.e īñToñ ko joḌ joḌ kar

ghar ke makīnoñ kī vafā zīnat-e-āshiyāñ huī

sūrat thī vo ki barq sī badliyoñ kī thī oT meñ

pardoñ se jhāñk jhāñk kar pardoñ meñ hī nihāñ huī

ek hī shāḳh par rahe baaḌh meñ saañp aur aadmī

kaisī ajiib dostī donoñ ke darmiyāñ huī

kaifiyat-e-dil-e-hazin hum se nahin bayan hui

lafz na sath de sake aansuon se ayan hui

shorish-e-wardat-e-qalb sheron mein Dhaal Dhaal kar

likhte rahe tamam umr KHatm na dastan hui

ab na wo dil mein dhaDkanen ab na wo soz-o-saz hai

puchhte hain wafat-e-dil kaise hui kahan hui

meri zara si baat par jaane wo kyun KHafa hui

koi na talKH guftugu donon ke darmiyan hui

ghar to hazaron ban gae inTon ko joD joD kar

ghar ke makinon ki wafa zinat-e-ashiyan hui

surat thi wo ki barq si badliyon ki thi oT mein

pardon se jhank jhank kar pardon mein hi nihan hui

ek hi shaKH par rahe baDh mein sanp aur aadmi

kaisi ajib dosti donon ke darmiyan hui