kai paDe hain farebi hisar shishe mein

ka.ī paḌe haiñ farebī hisār shīshe meñ

uThā ke sang-e-girāñ koī maar shīshe meñ

jahān-e-tāza kī tasḳhīr baad meñ karnā

tū apne dil ko to pahle utaar shīshe meñ

ye kis kā aks farozāñ hai bar dil-e-darvesh

dhamāl karne lagī hai bahār shīshe meñ

kabhī to aa dil-e-majzūb kī tasallī ko

mazīd baḌhne lagā intizār shīshe meñ

tū ḳhud ko khoj zarā aur aa.ine meñ dekh

paḌe haiñ aib tire be-shumār shīshe meñ

agarche pusht kiye baiThā thā mirī jānib

vo dekhtā thā mujhe baar baar shīshe meñ

purāne ḳhāl-o-ḳhad apne nikhārte hue vo

hazār baar huā ashk-bār shīshe meñ

sañvar rahā thā muqābil the aa.ine aur maiñ

mujhe bhī us ne kiyā thā shumār shīshe meñ

bas ek shaḳhs hai 'ahmad' jo mujh ko jāntā hai

maiñ dekhtā huuñ use ġham-gusār shīshe meñ

kai paDe hain farebi hisar shishe mein

uTha ke sang-e-giran koi mar shishe mein

jahan-e-taza ki tasKHir baad mein karna

tu apne dil ko to pahle utar shishe mein

ye kis ka aks farozan hai bar dil-e-darwesh

dhamal karne lagi hai bahaar shishe mein

kabhi to aa dil-e-majzub ki tasalli ko

mazid baDhne laga intizar shishe mein

tu KHud ko khoj zara aur aaine mein dekh

paDe hain aib tere be-shumar shishe mein

agarche pusht kiye baiTha tha meri jaanib

wo dekhta tha mujhe bar bar shishe mein

purane KHal-o-KHad apne nikhaarte hue wo

hazar bar hua ashk-bar shishe mein

sanwar raha tha muqabil the aaine aur main

mujhe bhi us ne kiya tha shumar shishe mein

bas ek shaKHs hai 'ahmad' jo mujh ko jaanta hai

main dekhta hun use gham-gusar shishe mein