kai payam bara-e-sukun-e-jaan to mile

ka.ī payām barā-e-sukūn-e-jāñ to mile

magar tamām huī apnī dāstāñ to mile

koī to samjhe mire karb kā lab-o-lahja

ye aarzū hai mujhe koī ham-zabāñ to mile

koī fazā koī mausam ho ham se ho mansūb

bahār agar nahīñ miltī hameñ ḳhizāñ to mile

maqām-e-shukr hai mere liye ki āḳhir-kār

mire harīfoñ meñ kuchh ahl-e-ḳhāndāñ to mile

huuñ ġham-nasīb to kyā ġham ki rāh-e-hastī meñ

talāsh-e-haq-o-sadāqat meñ ham-rahāñ to mile

yahī bahut hai ḳhizāñ ko ḳhizāñ jo kahte haiñ

kuchh aise phuul hameñ zeb-e-gulsitāñ to mile

shikasta-pā haiñ to kyā ham to sar ke bal jaa.eñ

magar ye baat koī mīr-e-kārvāñ to mile

hikāyat-e-dil-e-dard-āshnā sunā.ūñgā

tirī nazar se mujhe jur.at-e-bayāñ to mile

ye zindagī ke bayābāñ meñ dhuup kā sahrā

kahāñ qayām karūñ koī sā.ebāñ to mile

ye roz-o-shab bhī hamāre badal to sakte haiñ

kabhī zamīn se aa kar ye āsmāñ to mile

rihā hue haiñ magar 'lais' ye rihā.ī kyā

qafas se chhūTne vāloñ ko āshiyāñ to mile

kai payam bara-e-sukun-e-jaan to mile

magar tamam hui apni dastan to mile

koi to samjhe mere karb ka lab-o-lahja

ye aarzu hai mujhe koi ham-zaban to mile

koi faza koi mausam ho hum se ho mansub

bahaar agar nahin milti hamein KHizan to mile

maqam-e-shukr hai mere liye ki aaKHir-kar

mere harifon mein kuchh ahl-e-KHandan to mile

hun gham-nasib to kya gham ki rah-e-hasti mein

talash-e-haq-o-sadaqat mein ham-rahan to mile

yahi bahut hai KHizan ko KHizan jo kahte hain

kuchh aise phul hamein zeb-e-gulsitan to mile

shikasta-pa hain to kya hum to sar ke bal jaen

magar ye baat koi mir-e-karwan to mile

hikayat-e-dil-e-dard-ashna sunaunga

teri nazar se mujhe jurat-e-bayan to mile

ye zindagi ke bayaban mein dhup ka sahra

kahan qayam karun koi saeban to mile

ye roz-o-shab bhi hamare badal to sakte hain

kabhi zamin se aa kar ye aasman to mile

riha hue hain magar 'lais' ye rihai kya

qafas se chhuTne walon ko aashiyan to mile