kai raaz dil mein chhupae hue hain

ka.ī raaz dil meñ chhupā.e hue haiñ

na dekho hameñ ham jalā.e hue haiñ

yuuñ patthar se pukhrāj hone ko haiñ ham

ki sadiyoñ se ham to dabā.e hue haiñ

hameñ khul ke hañsne do ai duniyā vaalo

ki barsoñ ke ham to rulā.e hue haiñ

ye sailāb hai par ye paanī nahīñ hai

ye aañsū hamāre bahā.e hue haiñ

'azāb aise aise batā.eñ tumheñ kyā

hameñ kyā ḳhabar kis ke laa.e hue haiñ

bas ik saañs thī vo bhī chaltī nahīñ hai

vo jis din se ham se parā.e hue haiñ

na DhūñDo hameñ tum kitāboñ meñ 'shāhid'

vo alfāz haiñ jo miTā.e hue haiñ

kai raaz dil mein chhupae hue hain

na dekho hamein hum jalae hue hain

yun patthar se pukhraj hone ko hain hum

ki sadiyon se hum to dabae hue hain

hamein khul ke hansne do ai duniya walo

ki barson ke hum to rulae hue hain

ye sailab hai par ye pani nahin hai

ye aansu hamare bahae hue hain

'azab aise aise bataen tumhein kya

hamein kya KHabar kis ke lae hue hain

bas ek sans thi wo bhi chalti nahin hai

wo jis din se hum se parae hue hain

na DhunDo hamein tum kitabon mein 'shahid'

wo alfaz hain jo miTae hue hain