kai samton mein chalta ja raha hun

ka.ī samtoñ meñ chaltā jā rahā huuñ

ki chashma huuñ ubaltā jā rahā huuñ

ka.ī lahreñ uThātā jā rahā huuñ

ka.ī jauhar ugaltā jā rahā huuñ

isī paanī se maiñ zāhir huā thā

isī paanī meñ Daltā jā rahā huuñ

rukūñgā kyā hathelī par kisī kī

ki motī huuñ phisaltā jā rahā huuñ

baḌī mushkil se jo hāsil huī thī

vahī rangat badaltā jā rahā huuñ

koī pahuñchā rahā hai merā hissa

maiñ patthar meñ huuñ paltā jā rahā huuñ

samar bār-āvarī kā merā mausam

musalsal hai so phaltā jā rahā huuñ

jazīre haiñ ubharte jā rahe haiñ

samundar huuñ nigaltā jā rahā huuñ

du'ā huuñ jo laboñ par aa ga.ī hai

koī tūfāñ huuñ Taltā jā rahā huuñ

kai samton mein chalta ja raha hun

ki chashma hun ubalta ja raha hun

kai lahren uThata ja raha hun

kai jauhar ugalta ja raha hun

isi pani se main zahir hua tha

isi pani mein Dalta ja raha hun

rukunga kya hatheli par kisi ki

ki moti hun phisalta ja raha hun

baDi mushkil se jo hasil hui thi

wahi rangat badalta ja raha hun

koi pahuncha raha hai mera hissa

main patthar mein hun palta ja raha hun

samar bar-awari ka mera mausam

musalsal hai so phalta ja raha hun

jazire hain ubharte ja rahe hain

samundar hun nigalta ja raha hun

du'a hun jo labon par aa gai hai

koi tufan hun Talta ja raha hun