kai sitare yahan TuTte bikharte hain

ka.ī sitāre yahāñ TūTte bikharte haiñ

sab apnī satha se āḳhir kahāñ ubharte haiñ

na jaane kitne azāboñ meñ mubtilā ham haiñ

isī liye to na.ī aarzū se Darte haiñ

ham ek baar muhayyā na kar sake tujh ko

hazār rañg tirī justujū meñ bharte haiñ

ye jugnuoñ kī chamak raushnī nazar bhar kī

havā meñ uḌte musāfir kahāñ Thaharte haiñ

nafas nafas ke liye silsile talāsh karo

hamesha log yahāñ qurbatoñ pe marte haiñ

maiñ koī bahtā huā be-karāñ samundar huuñ

ik ā.īne meñ hazār ā.īne ubharte haiñ

vo pastiyāñ isī insān kā muqaddar haiñ

bulandiyoñ se farishte jahāñ utarte haiñ

ho apnā qurb mayassar to kuchh batā.eñ bhī

kahāñ kahāñ se tire saath ham guzarte haiñ

'hayāt' kuchh to kaho dostoñ kī mahfil meñ

ġhamoñ kī bhiiḌ meñ apne bhī ġham nikharte haiñ

kai sitare yahan TuTte bikharte hain

sab apni satha se aaKHir kahan ubharte hain

na jaane kitne azabon mein mubtila hum hain

isi liye to nai aarzu se Darte hain

hum ek bar muhayya na kar sake tujh ko

hazar rang teri justuju mein bharte hain

ye jugnuon ki chamak raushni nazar bhar ki

hawa mein uDte musafir kahan Thaharte hain

nafas nafas ke liye silsile talash karo

hamesha log yahan qurbaton pe marte hain

main koi bahta hua be-karan samundar hun

ek aaine mein hazar aaine ubharte hain

wo pastiyan isi insan ka muqaddar hain

bulandiyon se farishte jahan utarte hain

ho apna qurb mayassar to kuchh bataen bhi

kahan kahan se tere sath hum guzarte hain

'hayat' kuchh to kaho doston ki mahfil mein

ghamon ki bhiD mein apne bhi gham nikharte hain