kai tarah ke libas-o-hijab rakkhunga

ka.ī tarah ke libās-o-hijāb rakkhūñgā

udhaḌ rahā hai ye jīvan naqāb rakkhūñgā

koī kitāb thamā kar ġharīb bachchoñ ko

na.e daraḳhtoñ ke kuchh inqalāb rakkhūñgā

kabhī ġhurūr na aa.e kisī tarah mujh meñ

ki rahmatoñ kā maiñ us kī hisāb rakkhūñgā

mujhe savāl gaḌit ke samajh nahīñ aate

tire fareb ke kaise hisāb rakkhūñgā

bichhaḌ ke shāḳh se bahtā phirūñ razā us kī

kisī daraḳht pe jā kar ye ḳhvāb rakkhūñgā

ki pā liyā hai kise aur kho diyā kis ko

yahī savāl hai kyā kyā javāb rakkhūñgā

tujhe savāl kī mohlat kabhī nahīñ milnī

har ek vaqt ke pahle javāb rakkhūñgā

tumhāre hoñToñ pe maiñ ne kitāb likkhī hai

mirī kitāb kā 'unvāñ gulāb rakkhūñgā

kai tarah ke libas-o-hijab rakkhunga

udhaD raha hai ye jiwan naqab rakkhunga

koi kitab thama kar gharib bachchon ko

nae daraKHton ke kuchh inqalab rakkhunga

kabhi ghurur na aae kisi tarah mujh mein

ki rahmaton ka main us ki hisab rakkhunga

mujhe sawal gaDit ke samajh nahin aate

tere fareb ke kaise hisab rakkhunga

bichhaD ke shaKH se bahta phirun raza us ki

kisi daraKHt pe ja kar ye KHwab rakkhunga

ki pa liya hai kise aur kho diya kis ko

yahi sawal hai kya kya jawab rakkhunga

tujhe sawal ki mohlat kabhi nahin milni

har ek waqt ke pahle jawab rakkhunga

tumhaare honTon pe main ne kitab likkhi hai

meri kitab ka 'unwan gulab rakkhunga