kaisa hai zamane ka chalan dekh zara dekh

kaisā hai zamāne kā chalan dekh zarā dekh

yāroñ ke hai māthe pe shikan dekh zarā dekh

parde kī haqīqat se hue duur musalmāñ

poshāk meñ bhī nange badan dekh zarā dekh

aulād kī ḳhātir sabhī maañ baap yahāñ par

kyā kyā nahīñ karte haiñ jatan dekh zarā dekh

ghar baar kī fikreñ ab unheñ rauñd rahī haiñ

jo log the sarmāya-e-fan dekh zarā dekh

jo ahl thā mahrūm rahā daad se lekin

kis ko hai milī dād-e-suḳhan dekh zarā dekh

jiddat kahe jaatā hai tū gumrāhī ko paiham

apnā bhī to andāz-e-suḳhan dekh zarā dekh

ye ratjage āñkhoñ ko bhī vīrān na kar deñ

'anjum' mirī āñkhoñ meñ thakan dekh zarā dekh

kaisa hai zamane ka chalan dekh zara dekh

yaron ke hai mathe pe shikan dekh zara dekh

parde ki haqiqat se hue dur musalman

poshak mein bhi nange badan dekh zara dekh

aulad ki KHatir sabhi man bap yahan par

kya kya nahin karte hain jatan dekh zara dekh

ghar bar ki fikren ab unhen raund rahi hain

jo log the sarmaya-e-fan dekh zara dekh

jo ahl tha mahrum raha dad se lekin

kis ko hai mili dad-e-suKHan dekh zara dekh

jiddat kahe jata hai tu gumrahi ko paiham

apna bhi to andaz-e-suKHan dekh zara dekh

ye ratjage aankhon ko bhi viran na kar den

'anjum' meri aankhon mein thakan dekh zara dekh