kaisa jadu kaisa fitna dhyan mein rakkha gaya

kaisā jaadū kaisā fitna dhyān meñ rakkhā gayā

dil meñ kyā aayā ki dil insān meñ rakkhā gayā

bāvajūd is ke ki kuchh le kar nahīñ jā.ūñgā maiñ

jaane kyā kyā kuchh mire sāmān meñ rakhā gayā

so sarāboñ kā bharam rakhne kī ḳhātir yuuñ huā

ek naḳhlistān registān meñ rakkhā gayā

rāt-bhar jab royā panchhī kaalī chhat ko dekh kar

ek niilā āsmāñ zindān meñ rakkhā gayā

ḳhālī kamre aur bhī chhoTe nazar aane lage

jaise hī har chiiz ko dālān meñ rakkhā gayā

jo nahīñ thā kaam kā vo ghar meñ hī rakhnā paḌā

kaam ke sāmān ko dūkān meñ rakkhā gayā

naam sunte hī kisī kā muskurā detā thā vo

zikr merā bhī usī muskān meñ rakkhā gayā

fā.eda hote hī chal detā maiñ aisā thā nahīñ

phir bhī jaane kyoñ mujhe nuqsān meñ rakkhā gayā

us se thī ummīd sochegā mire baare meñ bhī

so usī kī shartoñ ko paimān meñ rakkhā gayā

kaisa jadu kaisa fitna dhyan mein rakkha gaya

dil mein kya aaya ki dil insan mein rakkha gaya

bawajud is ke ki kuchh le kar nahin jaunga main

jaane kya kya kuchh mere saman mein rakha gaya

so sarabon ka bharam rakhne ki KHatir yun hua

ek naKHlistan registan mein rakkha gaya

raat-bhar jab roya panchhi kali chhat ko dekh kar

ek nila aasman zindan mein rakkha gaya

KHali kamre aur bhi chhoTe nazar aane lage

jaise hi har chiz ko dalan mein rakkha gaya

jo nahin tha kaam ka wo ghar mein hi rakhna paDa

kaam ke saman ko dukan mein rakkha gaya

nam sunte hi kisi ka muskura deta tha wo

zikr mera bhi usi muskan mein rakkha gaya

faeda hote hi chal deta main aisa tha nahin

phir bhi jaane kyon mujhe nuqsan mein rakkha gaya

us se thi ummid sochega mere bare mein bhi

so usi ki sharton ko paiman mein rakkha gaya