kaisa wo mausam tha ye to samajh na pae hum

kaisā vo mausam thā ye to samajh na paa.e ham

shāḳh se jaise phal TuuTe kuchh yuuñ lahrā.e ham

barsoñ se ik aahaT par the kaan lagā.e ham

aaj is moḌ pe aap hī apne sāmne aa.e ham

ham se bichhaḌ kar tū ne ham ko kaisā diyā hai shaap

ā.īne meñ apnī sūrat dekh na paa.e ham

peḌoñ kā dhan luuT chuke haiñ lūTne vaale log

jism pe mal kar baiThe haiñ peḌoñ ke saa.e ham

sūraj nigleñ chāñdnī ugaleñ shāyad mumkin thā

lekin apnī is ummīd ke kaam na aa.e ham

parbat ho yā peḌ ghanā ho yā koī dīvār

terī yaad liye phirte haiñ saa.e saa.e ham

gum hotī sī lagtī hai is ghar kī har ik chiiz

aa.e haiñ bāzār se kaise thake-thakā.e ham

ab ye terī apnī ḳhushī hai jo tujh ko raas aa.e

ham aa.e to saath apne sab mausam laa.e ham

kaun kisī kā hotā hai ye jānte haiñ ham bhī

phir bhī sab se milte haiñ ye baat bhulā.e ham

aañkh khulī to sannāTe kī kokh meñ the be-sudh

koī ajab āvāz thī jis par uḌte aa.e ham

dhartī par rakh deñ to dhartī ke TukḌe ho jaa.eñ

sabr o ġham kā patthar haiñ siine se lagā.e ham

lamha lamha TuuT rahā hai kis kī Thokar se

dekhte dekhte ujaḌ rahe haiñ base-basā.e ham

kis kā chehra ubhar rahā hai dil ke mashriq se

dishā dishā meñ ghuum rahe haiñ haath baḌhā.e ham

gaah koī chaTTān jahāñ par vaqt kī chaap thame

gaah bane bahtā huā pal aur haath na aa.e ham

kaisa wo mausam tha ye to samajh na pae hum

shaKH se jaise phal TuTe kuchh yun lahrae hum

barson se ek aahaT par the kan lagae hum

aaj is moD pe aap hi apne samne aae hum

hum se bichhaD kar tu ne hum ko kaisa diya hai shap

aaine mein apni surat dekh na pae hum

peDon ka dhan luT chuke hain luTne wale log

jism pe mal kar baiThe hain peDon ke sae hum

suraj niglen chandni ugalen shayad mumkin tha

lekin apni is ummid ke kaam na aae hum

parbat ho ya peD ghana ho ya koi diwar

teri yaad liye phirte hain sae sae hum

gum hoti si lagti hai is ghar ki har ek chiz

aae hain bazar se kaise thake-thakae hum

ab ye teri apni KHushi hai jo tujh ko ras aae

hum aae to sath apne sab mausam lae hum

kaun kisi ka hota hai ye jaante hain hum bhi

phir bhi sab se milte hain ye baat bhulae hum

aankh khuli to sannaTe ki kokh mein the be-sudh

koi ajab aawaz thi jis par uDte aae hum

dharti par rakh den to dharti ke TukDe ho jaen

sabr o gham ka patthar hain sine se lagae hum

lamha lamha TuT raha hai kis ki Thokar se

dekhte dekhte ujaD rahe hain base-basae hum

kis ka chehra ubhar raha hai dil ke mashriq se

disha disha mein ghum rahe hain hath baDhae hum

gah koi chaTTan jahan par waqt ki chap thame

gah bane bahta hua pal aur hath na aae hum