kaise dil lagta haram mein daur-e-paimana na tha

kaise dil lagtā haram meñ daur-e-paimāna na thā

is liye phir aa.e ka.abe se ki mai-ḳhāna na thā

tum ne dekhī hī nahīñ taqdīr kī tārīkiyāñ

ik añdherī gor thī furqat meñ kāshāna na thā

majma-e-bait-ul-haram kī dhuum sunte the magar

jā ke jab dekhā to un meñ koī farzāna na thā

hashr meñ us shoḳh kā tarz-e-taġhāful dekhnā

mujh ko pahchānā nahīñ hālāñki begāna na thā

hashr meñ āḳhir use bhī chhoḌte hī ban paḌī

ḳhāna-e-madfan bhī goyā apnā kāshāna na thā

aisī kyā biitī ki 'muztar' un butoñ par mar miTā

jaan de detā vo kuchh aisā to dīvāna na thā

kaise dil lagta haram mein daur-e-paimana na tha

is liye phir aae kabe se ki mai-KHana na tha

tum ne dekhi hi nahin taqdir ki tarikiyan

ek andheri gor thi furqat mein kashana na tha

majma-e-bait-ul-haram ki dhum sunte the magar

ja ke jab dekha to un mein koi farzana na tha

hashr mein us shoKH ka tarz-e-taghaful dekhna

mujh ko pahchana nahin haalanki begana na tha

hashr mein aaKHir use bhi chhoDte hi ban paDi

KHana-e-madfan bhi goya apna kashana na tha

aisi kya biti ki 'muztar' un buton par mar miTa

jaan de deta wo kuchh aisa to diwana na tha