kaise in aankhon se dekhun mah-e-kaamil ki taraf

kaise in āñkhoñ se dekhūñ māh-e-kāmil kī taraf

maiñ ne dekhā hai jamāl-e-raunaq-e-dil kī taraf

dekh letā sirf apne ḳhāna-e-dil kī taraf

yūñhī maa.il ho gayā thā qais mahmil kī taraf

maiñ to mahv-e-be-ḳhudī thā mujh ko kyā ma.alūm hai

laayā hai merā junūñ kyoñ terī mahfil kī taraf

Dūbne vaale kī hasrat kā ye aalam dekhiye

phir nigāh-e-yās pahuñchī ahl-e-sāhil kī taraf

aaj bīmār-e-alam duniyā se yuuñ ruḳhsat huā

dam laboñ par thā magar āñkheñ thiiñ qātil kī taraf

tujh ko is rangīñ-nigāh-e-hashr-sāmāñ kī qasam

ik nigāh-e-lutf-parvar bhī mire dil kī taraf

le chalī be-tābī-e-dil aaj 'jauhar' khīñch kar

us but-e-rangīñ-nazar zohra shamā.il kī taraf

kaise in aankhon se dekhun mah-e-kaamil ki taraf

main ne dekha hai jamal-e-raunaq-e-dil ki taraf

dekh leta sirf apne KHana-e-dil ki taraf

yunhi mail ho gaya tha qais mahmil ki taraf

main to mahw-e-be-KHudi tha mujh ko kya malum hai

laya hai mera junun kyon teri mahfil ki taraf

Dubne wale ki hasrat ka ye aalam dekhiye

phir nigah-e-yas pahunchi ahl-e-sahil ki taraf

aaj bimar-e-alam duniya se yun ruKHsat hua

dam labon par tha magar aankhen thin qatil ki taraf

tujh ko is rangin-nigah-e-hashr-saman ki qasam

ek nigah-e-lutf-parwar bhi mere dil ki taraf

le chali be-tabi-e-dil aaj 'jauhar' khinch kar

us but-e-rangin-nazar zohra shamail ki taraf