kaise kaise KHwab ab hum ko dikhate hain ye log

kaise kaise ḳhvāb ab ham ko dikhāte haiñ ye log

ek pāgal ko yahāñ pāgal banāte haiñ ye log

jaane kyā is meñ raqam kar Daalā thā tū ne batā

itnī nafrat se jo terā ḳhat jalāte haiñ ye log

merī fitrat hai mujhe mushkil-pasandī kā hai shauq

is liye aksar hī mujh ko āzmāte haiñ ye log

hai gunāhoñ par mujhe afsos aur vo dekhiye

sharmsārī se yahāñ par muñh chhupāte haiñ ye log

jab se ye zāhir huā ki dil merā hai ā.īna

mujh ko aatā dekh kar patthar uThāte haiñ ye log

raakh ke ik Dher meñ tabdīl hogā ek din

phir na jaane kyoñ badan itnā sajāte haiñ ye log

maiñ sarā.e ke nigahbāñ kī tarah tanhā rahā

dil meñ mehmāñ kī tarah ab aate jaate haiñ ye log

raas aatā hī nahīñ hai sabr kā phal kyoñ unheñ

jald-bāzī meñ hamesha muñh kī khāte haiñ ye log

umr bhar laḌtā rahā jin ke liye maiñ ḳhud 'azān'

ban ke ab mere muḳhālif sar uThāte haiñ ye log

kaise kaise KHwab ab hum ko dikhate hain ye log

ek pagal ko yahan pagal banate hain ye log

jaane kya is mein raqam kar Dala tha tu ne bata

itni nafrat se jo tera KHat jalate hain ye log

meri fitrat hai mujhe mushkil-pasandi ka hai shauq

is liye aksar hi mujh ko aazmate hain ye log

hai gunahon par mujhe afsos aur wo dekhiye

sharmsari se yahan par munh chhupate hain ye log

jab se ye zahir hua ki dil mera hai aaina

mujh ko aata dekh kar patthar uThate hain ye log

rakh ke ek Dher mein tabdil hoga ek din

phir na jaane kyon badan itna sajate hain ye log

main sarae ke nigahban ki tarah tanha raha

dil mein mehman ki tarah ab aate jate hain ye log

ras aata hi nahin hai sabr ka phal kyon unhen

jald-bazi mein hamesha munh ki khate hain ye log

umr bhar laDta raha jin ke liye main KHud 'azan'

ban ke ab mere muKHalif sar uThate hain ye log