kaise karta un logon ka man kabhi main

kaise kartā un logoñ kā maan kabhī maiñ

bhuul nahīñ paayā apnā apmān kabhī maiñ

jis din har ghar ke chūlhe par aag jalī ho

dekh nahīñ paayā aisā din maan kabhī maiñ

chaah nahīñ hai man meñ ab kuchh bhī paane kī

roz sajāyā kartā thā armān kabhī maiñ

aaj luTānā chaah rahā huuñ sab kuchh apnā

ḳhuub juTāyā kartā thā sāmān kabhī maiñ

dafn hue jin kī āñkhoñ meñ ḳhvāb hazāroñ

de na sakā un ko pal-bhar muskān kabhī maiñ

biknā paḌ jaa.e to bik jā.ūñgā lekin

bech nahīñ saktā apnā īmān kabhī maiñ

dam hotā hai sāloñ ke anubhav kā is meñ

vyakt nahīñ kartā yuuñ hī anumān kabhī maiñ

logoñ ko dukh pahuñchātī haiñ achchhī bāteñ

chhoḌ diyā bāñTā kartā thā gyaan kabhī maiñ

mushkil se ban paatā huuñ maiñ mitr kisī kā

muft nahīñ detā 'naurang' anudān kabhī maiñ

kaise karta un logon ka man kabhi main

bhul nahin paya apna apman kabhi main

jis din har ghar ke chulhe par aag jali ho

dekh nahin paya aisa din man kabhi main

chah nahin hai man mein ab kuchh bhi pane ki

roz sajaya karta tha arman kabhi main

aaj luTana chah raha hun sab kuchh apna

KHub juTaya karta tha saman kabhi main

dafn hue jin ki aankhon mein KHwab hazaron

de na saka un ko pal-bhar muskan kabhi main

bikna paD jae to bik jaunga lekin

bech nahin sakta apna iman kabhi main

dam hota hai salon ke anubhaw ka is mein

wyakt nahin karta yun hi anuman kabhi main

logon ko dukh pahunchati hain achchhi baaten

chhoD diya banTa karta tha gyan kabhi main

mushkil se ban pata hun main mitr kisi ka

muft nahin deta 'naurang' anudan kabhi main