kaise na-karda gunahon ki pashemani mein hun

kaise nā-karda gunāhoñ kī pashemānī meñ huuñ

paḌh ke fard-e-jurm apnī saḳht hairānī meñ huuñ

mere andar hai tirī yādoñ kā girtā ābshār

muddatoñ se maiñ nasheb-e-koh-e-vīrānī meñ huuñ

dostoñ ne jab se kī mujh par ināyat kī nazar

tab se maiñ har lamha apnī hī nigahbānī meñ huuñ

jis jagah sannāTe bhī aane se karte haiñ gurez

us khañDar kī ek muddat se maiñ darbānī meñ huuñ

jiit kar bhī kis qadar vo ranj-e-tanhā.ī meñ hai

ḳhānumāñ-barbād ho kar maiñ farāvānī meñ huuñ

fikr koī haal kī 'aḳhtar' na maazī kā hai ġham

maiñ to aane vaale mausam kī pareshānī meñ huuñ

kaise na-karda gunahon ki pashemani mein hun

paDh ke fard-e-jurm apni saKHt hairani mein hun

mere andar hai teri yaadon ka girta aabshaar

muddaton se main nasheb-e-koh-e-virani mein hun

doston ne jab se ki mujh par inayat ki nazar

tab se main har lamha apni hi nigahbani mein hun

jis jagah sannaTe bhi aane se karte hain gurez

us khanDar ki ek muddat se main darbani mein hun

jit kar bhi kis qadar wo ranj-e-tanhai mein hai

KHanuman-barbaad ho kar main farawani mein hun

fikr koi haal ki 'aKHtar' na mazi ka hai gham

main to aane wale mausam ki pareshani mein hun