kaise nasib ka koi chakkar badal gaya

kaise nasīb kā koī chakkar badal gayā

merā Thikānā badlā tirā ghar badal gayā

dariyā ke ham kināre mileñge kabhī nahīñ

badlī fazā.eñ aisī ki manzar badal gayā

koī ḳhabar na us kī na paiġhām hī milā

aatā nahīñ hai chhat pe kabūtar badal gayā

mumkin nahīñ hamārī mulāqāt ho kabhī

ab tere kūche se mirā daftar badal gayā

ummīd thī sabhī ko nibhā deñge 'umr-bhar

pakkā irāda un kā ye kyūñkar badal gayā

jis kī misāl dete thakā maiñ nahīñ kabhī

hairān huuñ ki kaise vo dilbar badal gayā

tai thā badalnā us kā bhalā kaise rokte

afsos kyoñ kareñ mirā 'sāgar' badal gayā

kaise nasib ka koi chakkar badal gaya

mera Thikana badla tera ghar badal gaya

dariya ke hum kinare milenge kabhi nahin

badli fazaen aisi ki manzar badal gaya

koi KHabar na us ki na paigham hi mila

aata nahin hai chhat pe kabutar badal gaya

mumkin nahin hamari mulaqat ho kabhi

ab tere kuche se mera daftar badal gaya

ummid thi sabhi ko nibha denge 'umr-bhar

pakka irada un ka ye kyunkar badal gaya

jis ki misal dete thaka main nahin kabhi

hairan hun ki kaise wo dilbar badal gaya

tai tha badalna us ka bhala kaise rokte

afsos kyon karen mera 'sagar' badal gaya